Lubhalwe nguZukile Majova
Iqembu likaJulius Malema, i-Economic Freedom Fighters, liphinde labhekana nenkiyankiya yokusula esikhundleni kuka-Advocate Dali Mpofu.
UMpofu owayengummeli kalowo owayenguMengameli wezwe uMnuz Jacob Zuma ukuqinisekisile ukuthi ujoyina iqembu likaZuma i-MK.
Ukusuka kwakhe kulandela uhologo lokusula kwamalungu e-EFF ejoyina i-MK Party.
OwayeyiPhini likaMengameli we-EFF, uFloyd Shivambu, uvule amasango ngesikhathi ejoyina i-MK Party okwamenza wathola isikhundla esinamandla sokuba ngumgqugquzeli kazwelonke.
Obizwa ngokuthi “People’s Advocate” Mpofu ushiya kusele inyanga ngaphambi kokuthi kube nengqungquthela yokukhetha ubuholi ngoZibandlela.
UMpofu utshele i-SABC ukuthi ubona iqembu le-MK kuyilona lodwa elizama ukuhlanganisa abantu abamnyama ngaphansi kophahla olulodwa.
“Ngemuva kwemidlinzo eminingi ebenginayo ngithathe isinqumo sokuthi ngizojoyina i-MK Party. “Ngijoyina i-MK ngoba ngikholwa ukuthi yilona iqembu esizozuza ngalo ubumbano oludingeka kakhulu” u-Adv. Dali Mpofu.
UShivambu osehola uhlaka lokulanda abantu ukuthi bajoyine i-MK, uthe i-MK Party ilona kuphela iqembu eliheha ongoti abaphezulu abamnyama.
Iqembu le-MK limangaze izwe ngesikhathi lithola u-15% wevoti likazwelonke kanye namavoti angaphezu kuka-45% esifundazweni okuyikhaya likaZuma, KwaZulu-Natal.
UMalema uthe ulindele ukuthi baningi abaholi be-EFF abazolandela uShivambu uma bengakhethwanga ezikhundleni eziphezulu engqungqutheleni yokukhetha ubuholi.
Uveze ukuthi iLungu lePhalamende, uDkt Mbuyiseni Ndlozi nomkakhe beseka uShivambu ngokushiya iqembu le-MK.
UNdlozi ukhonjwa yizinhlaka zentsha ye-EFF njengozoba yiPhini likamengameli weqembu.