Lubhalwe nguSbongile Nonyana
Sishubile isimo phakathi kwe-EFF Student Command kanye ne-Sasco e-Tshwane University of Technology ngemuva kokushiswa kwamatende (gazebos) okukhankasela amaqembu womabili.
NgoLwesithathu kutholwe ama-gazebo amabili e-South African Students Congress (Sasco) edlelana ne-ANC eshisiwe eduze kwendawo yokubhukuda ntambama.
Kamuva ngalobo busuku, ngezithuba zabo-11:00, kwasabalala ividiyo ebonisa i-gazebo ye-Economic Freedom Fighters Student Command (EFFSC), ehambisana ne-EFF ivutha.
Ezinsukwini ezintathu ngaphambi kokhetho lwabafundi lwangesonto eledlule, kwaduka ama-gazebo e-Sasco amabili, abashiya bengenandawo yokufihla ikhanda ngesikhathi bekhankasela amavoti.
Lezi zinhlangano ezimbili zabafundi bezombusazwe bezilokhu zilwa kusukela i-EFFSC yahlula i-Sasco ngonyaka odlule ukuze ilawule inyuvesi yase-Soshanguve.
Umthombo utshele i-Scrolla.Africa ukuthi i-Sasco ikholelwa ukuthi amalungu e-EFFSC antshontshe ama-gazebo awo.
“Ngemuva kokuthola i-gazebo yabo ishile, amalungu e-Sasco antshontshe i-gazebo ye-EFFSC ayishisa,” kusho umthombo.
Elinye ilungu le-Sasco elikhethe ukungadalulwa igama lisole i-EFFSC ngokuzama ukudala uthuthuva ngaphambi kokhetho.
“Siyabazi ukuthi bangobani, futhi sizobaqondisa. Bacabanga ukuthi baphethe lesi sikhungo,” kusho ilungu le-Sasco.
Inyuvesi ibingakaphawuli ngalezi zigameko.
Esithombeni ngenhla: Ama-gazebo ashayo.
Umthombo: Uthunyelwe