Lubhalwe nguCelani Sikhakhane
USomlomo omusha we-ANC kuMasipala waKwaNongoma ubhekane nobunzima ngosuku lokuqala emsebenzini.
NgoLwesine ufike iminyango yamahhovisi ivalwe i-IFP yamatshela emehlweni ukuthi akagibele itekisi agoduke.
Laba abebengaphakathi basishaye indiva isicelo sikaBabongile Sithole ecela ukuthi bamvulele, bamtshela ukuthi akahambe ayobamba i-Uber agoduke!
Ngokomyalelo wenkantolo uSithole waphinde waqokwa ngoNhlolanja esikhundleni sokuba nguSomlomo KwaNongoma.
Lesi simemezelo senziwe ngaphambi komhlangano obugcwele amaphoyisa, izikhulu zakwa-Cogta, amakhansela e-ANC, i-EFF naweNFP.
Ngemuva kokuqokwa kukaSithole uphuthume ehhovisi likaSomlomo eyoqhubeka nomsebenzi wakhe.
Kodwa akuficile umnyango ubukhiyiwe.
Ethukuthele egane unwabu ubeshaya isicabha efuna izikhiye, kodwa akekho omnakile.
U-Albert Mncwango we-IFP ubengaphakathi ebhilidini ngokuhamba kwesikhathi utshele i-Scrolla.Africa ukuthi angamemeza agcine lapho ethanda khona, kodwa ngeke abathole okhiye basehhovisi noma okhiye bemoto kaSomlomo.
“Asimthathi njengoSomlomo okumele akwenze ukugibela amatekisi agoduke, amatekisi ethu KwaNongoma asezingeni eliphezulu kwezokuphepha.
“Uma engafuni ukugibela amatekisi sizomsiza simbizele i-Uber ngoba siyazi ukuthi akanayo imoto. Empeleni ngiseyiMeya, uMshangane Ndabandaba uyiPhini leMeya yethu uMntwana uBheki Zulu unguSomlomo kuyoze kube unyaka ka-2026,” kusho uMncwango.
USithole ube esegibeliswa omunye wabaholi be-ANC baya eshisanyama, ebizwa nge-Roc A Fella Lounge ukuyobungaza ukunqoba kwabo.
UMncwango uthe basaphethe kwaNongoma ngoba sebesifakile isicelo sokudlulisa icala.
UNobhala we-ANC eMzala Nxumalo Region uthe ukuqokwa kukaSithole kusho ukuphela kwenkohlakalo nezinxushunxushu KwaNongoma.
“I-IFP isiphendule lo Masipala indawo yodlame ngenxa yokuziphatha kwayo okungalawuleki.
Uthe bazosebenzisana nawo wonke amaqembu ukuletha uzinzo emkhandlwini baphinde bakhethe iPhini leMeya elisha ngemuva kokusula kwekhansela le-EFF uMnu Sabelo Nkosi.
Wonke amakhansela e-ANC ne-EFF abehambele lo mhlangano, kodwa kwi-NFP kufike amane kuphela. Bonke abavota ne-IFP bawushaye indiva umhlangano.
Isithombe esingenhla: UMasipala Wendawo KwaNongoma
Umthombo wesithombe: UCelani Sikhakhane