Kamogelo Muvhenzhe
Kushone umfundi obeneminyaka eyi-19 ubudala ngemuva kokugwazwa ngommese ngomunye umfundi kubangwa umakhalekhukhwini esikoleni esisendaweni yaseNtabazwe ngase-Harrismith.
Okhulumela amaphoyisa ase-Free State uBrigadier uMotantsi Makhele uthe babizwe esikoleni samabanga aphezulu iLerato Thando High School ngoLwesine ntambama.
“Ngesikhathi efika amaphoyisa aholelwe kwelinye lamagumbi esikoleni lapho isidumbu somfundi besidindilize khona kunedamu legazi eduze komnyango,” kusho uMakhele.
Kusolakala ukuthi umfundi webanga leshumi nesishiyagalombili, waya egumbini lebanga leshumi nesishiyagalolunye lapho efice iqulu labafana bedlala ngomakhalekhukhwini kuthiwa wathatha umakhalekhukhwini wanqaba ukuwubuyisela.
Ngokusho kwamaphoyisa, umsolwa oneminyaka eyi-17 uthathe ummese komunye wabafundi afunda nabo wagwaza umufi esifubeni waquleka washonela khona lapho.
“Umfundi uboshiwe wathweswa icala lokubulala. Uzovela enkantolo yemantshi yase-Harrismith maduze ngaphansi kwesandla sabazali bakhe,” kusho uMakhele.
Umthombo wesithombe: Facebook