Lubhalwe nguCelani Sikhakhane
Isemanzini iNdlunkuku kaZulu ngemuva kokudlula emhlabeni kukanina omncane weSilo Samabandla uZwelithini kaBhekuzulu osakhothama,uMntwana u-Alice kaSolomon kaDinuzulu.
UMntwana u-Alice udlule emhlabeni ngoMsombuluko ntambama ngemuva kokugula. Ubengubabekazi weSilo Samabandla esibusayo, uMisuzulu kaZwelithini.
UNdunankulu weNgonyama nesizwe samaZulu uMntwana wakwaPhindangene uMangosuthu Buthelezi umemezele lezi zindaba.
“Kungizwisa ubuhlungu ukuthi nginazise ngokudlula emhlabeni kukaMntwana u-Alice, obeyindodakazi yeSilo uSolomon kaDinuzulu,” kusho uButhelezi.
UMengameli uCyril Ramaphosa naye udlulise amazwi enduduzo kwiSilo Samamabandla kanye naseNdlunkulu.
“Egameni likahulumeni kanye nabantu bakuleli, uMengameli Ramaphosa udlulisa imithandazo nemicabango yakhe kwiNdlunkulu kaZulu kanye nesizwe sonke samaZulu ngokulahlekelwa uMntwana,” fundeka isitatimende sehhovisi likamengameli.
UMntwana u-Alice wathola udumo ngokuhola umkhosi womhlanga wokuqala ngo-1984.
Ukudlula kwakhe emhlabeni kulandela ukudlula komshana wakhe obengundabamlonyeni, uMntwana Thembi Zulu-Ndlovu, obethathwa njenge linye lamavukelambuso eNdlunkulu.
INdlunkulu kaZulu selokhu yakhungathwa izigigaba ezimbi kulandela ukushona kukaMntwana uLethukuthula ngo-2020. UMntwaba uLethukuthula ngomunye owayebhekwe ukuthi athathe isihlalo sobukhosi, kodwa wadlula emhlabeni ngaphambi kokukhothama kukayise iSilo Samabandla uZwelithini kaBhekuzulu.
Kuthe besadlulisa ubuhlungu abasebukhosini bazithola sebegubuzelwe ifu elimnyama ngemuva kokukhothama kukaNdlunkulu uMantfombi kaSobhuza waKwaKhangelamankengane lapho bekuhlala khona uMntwana u-Alice.
Ukukhothama kukaNdlunkulu uMantfombi kaSobhuza kulandelwe ukukhothama kukaMntwana uMgidlana obelwela ukuthi iSilo Samabandla uMisuzulu kaZwelithini sithathe izintambo zobukhosi.
UButhelezi uthe iSilo Samabandla uMisuzulu kaZwelithini zimuzwisa ubuhlungu kakhulu lezi zindaba.
“Ngifisa ukudlulisa amazwi enduduzo kwiSilo naseNdlunkulu kulesi sikhathi esinzima.
Osesithombeni esingenhla: UMntwana u-Alice kaSolomon kaDinuzulu
Umthombo wesithombe: @GPMadamSpeaker
.
