Lubhalwe nguZukile Majova
Umhleli Wezepolitiki
Usephenduke inhlekisa uLucky Montana owayeyisikhulu esiphezulu kwa-Passenger Rail Association of South Africa (Prasa).
Inhloko yezobunjiniyela ayethula kwa-Prasa njengongoti womhlaba wonke kwezobunjiniyela bezitimela isivele izinqa obala ngokuqamba amanga ngeziqu zayo.
Ngesonto eledlule, uMontana ugubhe ukufungiswa njengelungu lePhalamende elimele iqembu le-MK.
Kube wukubuyela kwakhe esigabeni esiphezulu ngemuva kokuwa emuva kokudunwa kombuso (state capture) kanye nokubusa kukaJacob Zuma njengoMengameli wezwe.
UMontana, osethembeke kuZuma iminyaka eminingi, uphakathi kwenqwaba yababesolwa ngokudunwa kombuso asebephenduke amalungu ePhalamende eqembu le-MK.
NgoLwesibili, “uDkt” Daniel Mthimkhulu – indoda eqashwe uMontana njengenhloko yezobunjiniyela kwa-Prasa – ugwetshwe iminyaka engu-15 ebhadla ejele yi-Palm Ridge Commercial Crimes Court ngokuqamba amanga ngeziqu zakhe.
UMontana wayethi uMthimkhulu ufunwa kakhulu kangangokuthi izinkampani zase-Germany nezinye izimakethe zangaphandle zifuna ukumqasha.
Ngenxa yalokhu, iholo lakhe lonyaka lanyuswa lisuka ku-R1.6-million laya ku-R2.8-million.
OKlebe bathi uMthimkhulu wathi uneziqu ze-Master’s azithola eNyuvesi yase-Wits kanjalo neziqu zobudokotela kwezobunjiniyela azithola e-Munich Technical University e-Germany.
Lo dokotela mbumbulu ubekwe amacala ayisishiyagalolunye okubalwa kuwo awokukhwabanisa nawokukokotela.
INkantolo eNkulu yaseGoli imyalele ukuthi abuyisele u-R5.8-million kwa-Prasa yaphinde yathatha nempahla yakhe.
UNobhala Jikelele we-ANC, uMnuz Fikile Mbalula, oshiye uZuma wajoyina uMnuz Cyril Ramaphosa, ungomunye wabantu bokuqala abahlekise ngoMontana.
Esithombeni ngenhla: ULucky ‘Mampara’ Montana.
Umthombo: X