Lubhalwe ngu-Everson Luhanga
I-City Power inqamule ugesi ezitolo ezingaphezu kuka-15 eziphethwe abantu bamazwe angaphandle e-Eldorado Park, eGoli ezirobha amamitha kagesi wekhadi.
Okhulumela iCity Power u-Isaac Mangena uthe ukuqala kwalo msebenzi kwenzeke e-Eldorado Park Extension 1 no-2 ngoLwesine.
Inhloso ukunqamula izintambo ezixhunywe ngokungekho emthethweni kanye nabarobha amamitha ekhadi likagesi ukuze banciphise umthwalo edolobheni lonke.
UMangena uthe iCity Power ibhekene nezinga eliphezulu lokusebenza kwamandla kusukela kuqale ubusika, okwandisa ubungozi bokulimala kwengqalasizinda kanye nokuwa kwegrid.
“Ekuphenduleni kule nselelo, iCity Power yethula izinhlelo zokwehlisa umthwalo. Lezi zinhlelo zihlanganisa ukufakwa kwamagiza elanga emakhaya, ama-microgrid emijondolo kanye nama-ripple relays ezindaweni ezisemadolobheni. Basebenzise nezinyathelo ezinjengohlelo lokunciphisa umthwalo kumakhasimende ebhizinisi.
“Ukunqamula izintambo ezixhunywe ngokungemthetho kusenkabeni yezinhlelo zenkampani zokudambisa umthwalo. Ukuxhuma ngokungemthetho kanye nokuphazamiseka kwamamitha kungezinye zezinto ezinomthelela omkhulu ekugcwaleni kwenethiwekhi, okuvamise ukuholela ekutheni inani eliphezulu lama-transformer kanye neziteshi ezincane zicekeleke phansi,” usho kanje.
UMangena uthe inkinga yamabhizinisi asemagcekeni nayo ikhombisa ukubakhathaza kakhulu ngoba iningi labanikazi bezindlu badinga ukufaka izicelo ezidingekayo edolobheni ukuze amabhizinisi abo agunyazwe ngendlela futhi athuthukiswe ngezinsiza eziningi ukuze ahlangabezane nezidingo zebhizinisi.
“Yilokhu esihlangane nakho e-Eldorado Park ngesikhathi besinqamula izintambo,” kusho yena.
Uthe amakhansela endawo nabaholi bomphakathi bajoyine izikhulu zeCity Power ngesikhathi somkhankaso wokunqanyulwa kwawo.
“Siqaphele ukuthi abanikazi bezindlu bavele baxhumise izipaza ezisebenza emagcekeni abo ukusuka kulena ekhona yasendlini, lokho kwenza ukuthwala umthwalo oweqile kugesi,” usho kanje.
“Abalelwa ku-15 amabhizinisi anqanyulelwe ugesi ngokushesha ngo-level 3 ngokulimaza ingqalasizinda kagesi. Lokho bekuwukuvimbela amathuba okuthi amakhasimende afanayo aphinde axhume amabhizinisi awo ngokungemthetho esikhathini esizayo.”
IKhansela uJuwairiya Kaldine wakule ndawo uthe: “Izitolo zineziqandisi ezingaphezu kwezintathu, ngasinye sifaka ingcindezi enkulu kwigrid.
Isithombe esingenhla: I-City Power inqamula ugesi ezipaza ezixhume ngokungekho emthethweni.
Umthombo: Sithunyelwe