Dylan Bettencourt
Sekuyisikhathi eside uNick Kyrgios aziwa njengomdlali othanda ukukhuluma, kodwa ongenzi njengokukhuluma kwakhe.
Lo mdlali wethenisi wase-Australia ubesefomini enhle ngesikhathi efinyelela kowamanqamu okokuqala kwi-Grand Slam e-Wimbledon ekuqaleni kwalo nyaka. Yize ehlulwe nguNovak Djokovic kowamanqamu uKyrgios ubesefomini engcono kakhulu empilweni yakhe.
Eya ku-US Open uKyrgios akakaze athathwe njengentandokazi, kodwa ngemuva kokukhipha umpetha womhlaba wokuqala kanye nompetha we-US Open uDaniil Medvedev angase abe intandokazi.
Lo mdlali oneminyaka engu-27 ubudala uthole ukunqoba ngo-7-6 (13-11) 3-6 6-3 6-2 kowe-last 16 ukuze afinyelele kuma-quarter-final e-Flushing Meadows e-New York.
Manje uMedvedev uzolahlekelwa indawo yakhe yokuqala emhlabeni. Ngakolunye uhlangothi uKyrgios uzobuyela ku-top 20.
“Bekuwumdlalo omangalisayo. UDaniil ungumpetha ovikelayo futhi unengcindezi enkulu emahlombe akhe, kodwa bengidlala kahle muva nje,” kusho uKyrgios ngemuva kokunqoba kwakhe.
“Abantu base beqala ukungabaza ikhono lami lokukhipha imidlalo efana nalena kuma-majors. Ngiyaziqhenya ngempela ngami. Bekungelula ukubhekana nakho konke ukugxekwa.”
UKyrgios kuwo wonke umsebenzi wakhe ubonise amazwibela ethalente, kodwa akakaze afeze amandla abantu abaningi ababekholelwa ukuthi wayenawo.
Ukuba ezindaweni ezesabisa ngempela ngokwengqondo” kuyikhinyabezile inqubekelaphambili yakhe futhi ukuvumile lokho.
Kodwa ekufinyeleleni kowamanqamu e-Wimbledon ukhombisile ukuthi unakho okudingekayo ukuze abe ngumnqobi we-Grand Slam.
“Ngizizwa sengathi ngidlala kakhulu futhi nginogqozi olukhulu.”
“Sekuphele izinyanga ezine ngingekho ekhaya. Iqembu lami lonke selibonile. Asikwazi ukubona imindeni yethu njengoba kwenza abanye abadlali bethenisi isikhathi esiningi.”
Ngisho noMedvedev ukholelwa ukuthi uKyrgios angawina i-Grand Slam yakhe yokuqala uma eqhubeka nefomu akuyo njengamanje.
“Uma edlala kanje kuze kuphele umqhudelwano unawo wonke amathuba okuwunqoba. Kodwa uzothola izimbangi ezinzima,” kusho lo mdlali wase-Russia.
Okulandelayo uKyrgios uzobhekana noKaren Khachanov wase-Russia namhlanje ebusuku.
Umthombo wesithombe:@BarstoolSports