Lubhalwe nguBuziwe Nocuze
Owesilisa uhola u-R6,500 njengonogada kodwa wenza imali engaphezu kuka-R7 000 ngenyanga ngomsebenzi wakhe wokudayisa ngomzimba, ukhokhisa imali efika ku-R900 ngobusuku.
Uthumela u-R3 000 ekhaya wokuthenga ukudla, akhokhele umshwalense womndeni nerenti, futhi ukwazi ukonga u-R500 nyanga zonke ezimeni eziphuthumayo.
Unogada oneminyaka engu-45 ubudala waseKapa uthi wadayisa ngomzimba ukuze akwazi ukondla umndeni wakhe futhi babe nophahla emakhanda abo.
Uhola u-R6 500 ngenyanga njengonogada kodwa wondla izingane ezimbili nezingane zakubo ezinhlanu. Eminyakeni emithathu edlule, wanquma ukuthola omunye umthombo wemali.
“Ekuqaleni bekungelula ukuthi ngiwenze lo msebenzi, kodwa njengoba ngingephuli umthetho ngazitshela ukuthi ngizowenza ukuze nginakekele umndeni wami,” usho kanje.
Uqale ngokuthumelela amakhasimende amavidiyo ocansi ngo-R300 iyinye. Ngemva kwezicelo eziningi becela ukuhlangana naye, wanquma ukuqala ukubona amaklayenti ubuso nobuso.
Manje usebiza u-R700 ngobusuku kodwa uthi amanye amakhasimende akhokha imali efinyelela ku-R900 ngoba ejabule ngomsebenzi wakhe.
Ukhangisa ngegama elingelona iqiniso kuFacebook. “Amakhasimende adlulisela kimina abanye abantu, yileyo ndlela engithola ngayo amakhasimende amaningi,” esho.
Owesilisa uthe uthumela u-R3 000 emndenini wakhe ukuze uthole igilosa bese ekhokha u-R400 womshwalense. Usebenzisa u-R1,500 ethenga ezitolo, u-R1,100 wokugibela, u-R350 kumshwalense wakhe kanye no-R1 000 wokuqasha.
“Yize ngenza lomsebenzi eceleni kodwa kunezinto engingazeni njengokuphuma noma ukudla inyama ebomvu kabili ngesonto, ngonga u-R500 ngenyanga,” usho kanje.
Ubheka ukuphepha njengento ebalulekile futhi wabelana ngendawo akuyo kubangani bakhe uma evakashela amakhasimende.
Uthi akazimisele ukuyeka maduze ngoba imali eyengeziwe imenza akwazi ukukhokhela zonke izindleko zakhe.
Ngaphambi kwalokhu, ngangihlale ngicindezelekile ngosuku lokuhola ngoba iholo lami lalinganele. Manje sengiyakwazi ukuzinakekela mina nomndeni wami.”
Ngenxa yokuthi ngezinye izikhathi usebenza ama-shift asebusuku, uhlangana namakhasimende emini lapho esemsebenzini ebusuku, nasebusuku lapho esebenza emini.
Amanye amakhasimende akhe aze asize ngemali yokuthutha.
“Inqobo nje uma umndeni wami ungalambi, ngizoqhubeka nalo msebenzi oseceleni. Akumele bazi ukuthi ngenzani.”
Esithombeni esingenhla:
Umthombo wesithombe: