Lubhalwe nguBuziwe Nocuze
USinovuyo Mzayiya (26), waseKapa, ushaywe kanzima ngesitini yisoka lakhe esigamekweni esishaqisayo sokuhlukunyezwa ngokobulili.
UMzayiya ubevakashele umngani wesifazane kanti ubehlele ukuyolala.
“Ubazi ukuthi ngikubo kamngani wami, kodwa waqhamuka wangisola ngokuthi bengingazibambi izingcingo zakhe, waqala wangishaya singakaphumi nasendlini eNyanga,” kusho yena.
“Ngibe naye unyaka, futhi akakaze angilimaze ngaphambilini. Ngethukile ngesikhathi eqala ukungishaya.”
Isoka lakhe belimsola ngokuziba izingcingo zakhe nokungabuyi ekhaya njengesithembiso.
Uzame ukubaleka abuyele endlini yomngane wakhe, kodwa uqhubekile wamshaya.
“Abantu bazamile ukumvimba, kodwa wabasabisa. Ngibonga nje ukuthi ngisaphila, nakuba nginomthungo ekhanda lami,” kusho uMzayiya.
“Ubelokhu efonela abangani bami, ebacela ukuthi ngimxolele. Uthi akazi ukuthi kwenzeke kanjani lokhu, kodwa mina ngifuna ubulungiswa.”
Lesi sigameko senzeke ngoMsombuluko ekuseni, kodwa isoka belingakaboshwa.
Ngemuva kokukhipha udaba lwakhe nezithombe zakhe ezinkundleni zokuxhumana, abanye abantu baqale amahlebezi okuthi uMzayiya ugwaze isoka lakhe kanti lisesibhedlela.
UMzayiya uthe: “Laba abantu abanamanga abafuna ukucekela phansi igama lami. Uma ngimgwazile kungani amaphoyisa esamthungatha? Ukube usesibhedlela ngabe amaphoyisa asho njalo.”
Okhulumela amaphoyisa aseWestern Cape u-Anelisiwe Manyana ukuqinisekisile ukuthi amaphoyisa aseNyanga avule icala lokushaya ngenhloso yokulimaza.
Akekho osaboshiwe okwamanje, uphenyo lusaqhubeka,” kusho uManyana.
I-Safer Spaces NGO ithi phakathi kuka-25% no-40% wabesifazane baseNingizimu Afrika bake babhekana nobudlova ngokocansi noma ukuhlukunyezwa abasondelene nabo empilweni yabo.
I-Stop Gender Violence Helpline 0800 150 150 ihlinzeka ngosizo luka-24/7 kwabesifazane ngazo zonke izilimi ezisemthethweni ezingu-11.
Esithombeni esingenhla: USinovuyo Mzayiya usesele nomthungo ekhanda ngemuva kokushaywa ngesitini yisoka lakhe limsola ngokungalubambi ucingo lwakhe.
Umthombo: Sithunyelwe