Owesifazane oshonile udle umhlanganiso okhethweni lwasekhaya eNdiya ngemuva kokuthi abalandeli bakhe befeze isethembiso sabo sokumeseka ngisho esedlulile emhlabeni.
U-Ashiya Bi obeqala ngqa ukungenela ukhetho uthole amavoti acishe abe ngu-44% esikhundleni senhlangano kamasipala e-Uttar Pradesh okuyisifunda esinabantu abaningi kuleliyazwe.
Lowo obengenele ukhetho (30) ugule kakhulu njengoba kubikwa ukuthi ubephethwe isifo esiyingozi samaphaphu kanye nesisu kanti ushone ezinsukwini ezingu-12 ngaphambi kokhetho.
Yize umyeni wakhe azise izikhulu zokhetho ukuthi ushonile ibingekho inqubo ebingasetshenziswa ukususa igama lakhe ohlwini lwabazokhethwa, ngokusho kwesikhulu sesifunda uBhagwan Sharan, kubika i-NTV.
Ngesikhathi inqubo yokhetho iqhubeka futhi ingenakuvinjwa abavoti bavotele uBi bafeza isethembiso sabo sokumeseka njengesenzo sokumhlonipha.
Lona wesifazane ongasekho usungule ukuxhumana okuqinile nabavoti wazuza udumo olukhulu phakathi nomkhankaso wakhe.
“U-Ashiya wenze abangani kalula futhi abantu bebengafuni ukwephula isethembiso ababemnike sona,” kusho isakhamuzi sendawo uMohammad Zakir etshela i-Times of India.
Umyeni kaBi, uMuntazim Qureishi ukuncomile ukuzola kwakhe waphinde wazwakalisa ukubonga ngokwesekwa.
Uphawule wathi, “Amavoti ethu awokumhlonipha.”
Omunye umvoti u-Arif uhambe emazwini kaMuntazim wathi: “Uzuze izinhliziyo zethu.”
Luhlanganiswe nguMbhali we-Staff
Esithombeni esingenhla: U-Ashiya Bi