Lubhalwe nguMichael Madyira
Umqeqeshi we-Orlando Pirates uJose Riveiro ukhulume ngengcindezi asanda kubhekana nayo ngesikhathi behlulwa kathathu kwi-Premier Soccer League.
IPirates yenze ezibukwayo ngoMgqibelo ngesikhathi ihlula iGolden Arrows ngo 3-1 ekhaya.
URiveiro uthi ukuhlulwa emidlalweni emithathu kulandelana kwaba isikhathi esinzima esiye samenza wangakwazi ukudla kanye nokulala.
Lo mqeqeshi wase-Spain uthe ukucindezeleka okulethwe ukuhlulwa kuphinde kwaphazamisa abasizi bakhe kanye nabadlali bakhe.
“Akusona isimo okulula ukusamukela ngemuva kwemiphumela emithathu yokugcina,” kusho uRiveiro esithangamini nabezindaba ngemuva komdlalo.
“Ngokujwayelekile wonke umuntu okhona ngemuva kwami kuleli qembu unokuncintisana kakhulu. Yibona kanye abantu abangalali uma singawini.”
“Uma ngingawini angikwazi ukudla isidlo sakusihlwa, angibi nabo ubuthongo futhi angidli nesidlo sasekuseni. Akwenzeki lutho futhi kwesinye isikhathi kuba kuningi kakhulu, kufanele ngikusho lokhu. Nakubadlali kuyafana yize ungacabanga ukuthi abanendaba.”
“Babasesimweni esinzima futhi bayazi ukuthi kusho ukuthini. Namuhla [ngoMgqibelo] siqede umdlalo sinamaphuzu amathathu. Benza lokho obekufanele bakwenze kulezi zimo; akukho okunye ngaphandle kokuqhubeka kuze kube sekupheleni nokuthi babe nesibindi.”
Isimo esibi iPirates ebibhekene naso besidalwa ukungadlali kahle kwayo njengoba ibilwela ukuthola amagoli.
Kodwa uRiveiro ukuvikele ukuqhudelana kweqembu lakhe okuhlanganisa nabagadli abadukile wathi kunombango onzima wezindawo zokudlala.
“Sengikusho kaningi lokhu. Ngabadlali esinabo eqenjini, izinga esinalo kuzo zonke izindawo, indawo yabadlali abadlala phambili ayihlukile,” kusho uRiveiro.
“Umncintiswano wenza kube nzima ukuba sisikwatini esizoqala. Kunzima ngisho ukufaka abadlali abangu-20 ohlwini. Uma abadlali bekhona esikwatini kusho ukuthi bebeqhuba kahle phakathi nesonto. Siyakholelwa ngempela ohlelweni lwethu lokuqeqesha.”
Ngemuva kokuveza ukwaneliseka ngeqembu lakhe, kuzobonakala ukuthi umqeqeshi waleli qembu lase-Soweto uzobengeza yini abanye abadlali kuleli windi lokufuduka kwabadlali ngoMasingana njengoba esesayinise uCraig Martin noNdumiso Mabena.
Emdlalweni olandelayo iPirates izokwamukela iStellenbosch ngomhlaka-22 kuMasingana njengoba ifuna ukuwina kabili kulandelana.
Umthombo wesithombe: Orlando Pirates