Dylan Bettencourt
Owayengumdlali we-Barcelona u-Eric Abidal kubikwa ukuthi uyaphenywa ngokushushumbisa izitho zomzimba.
Lokhu kuza ngemuva kokuthi umzala owanikela ngengxenye yesibindi sakhe ku-Abidal kutholakale ukuthi empeleni akahlobene nalo mdlali owayedlalela emuva.
Lokhu kubalulekile ngoba ukufakelwa kwezitho zomzimba kunohlu lokulinda futhi kungathatha iminyaka ukuthi uthole umuntu ozonikela ofanelekile. Uma ilungu lomndeni likwazi ukunikela ngesitho, isiguli asidingi uhlu lokulinda futhi lowomuntu uba phambili ohlwini.
Lo mdlali wasesiswini we-Barcelona kwatholakala ukuthi unomdlavuza ngonyaka ka-2011 ngemuva kokutholakala kwethumba kwisibindi sakhe. Watshelwa ongoti bezokwelapha ukuthi ingxenye yesibindi sakhe kuzodingeka ishintshwe kufakwe esomuntu ozovuma ukunikela.
UGerard Armand, owesilisa othi ungumzala walo mdlali, wanikela ngengxenye yesibindi sakhe ku-Abidal ngo-2012 ngaphambi kokubuya kuka-Abidal ebholeni ngonyaka olandelayo.
Ngemuva kweminyaka emihlanu ngo-2017, iziphathimandla zendawo zaphenya ngokuhlinzwa kodwa izinsolo zahoxiswa ngemuva kwezinyanga ezithile.
Kodwa-ke, ukuhlinzwa sekuphinde kwabuzwa. Ngokusho kwe-Spanish publication i-El Confidencial, i-National Institute of Toxicology ayitholanga ubufakazi obukhombisa ukuthi kukhona ubuhlobo phakathi kuka-Abidal no-Armand.
Lolu phenyo luphinde luxhumanise u-Abidal nalowo owayenguMengameli we-Barcelona uSandro Rosella kanye nowayengumqondisi weqembu uJuanja Casitllo okusolakala ukuthi baba nesandla ekushushumbiseni izitho zomzimba.
U-Abidal akayena umuntu ongaziwa ezintweni ezimbi. Ngasekupheleni konyaka owedlule unkosikazi womdlali webhola wase-France wasolwa ngokuhlela ukuhlasela umdlali webhola labesifazane we-PSG uKheira Hamraoui.
Lokhu bekwenziwa ukuthi u-Abidal ubesolwa ngokuthandana noHamraoui kodwa asikho isiqinisekiso sokuthi kungani lo mdlali webhola ehlaselwa. Unkosikazi ka-Abidal usefake isehlukaniso, enezela ezinsolweni zokujola kukamnyeni wakhe.
Imibiko iveza ukuthi u-Abidal wavuma ukuthi bayathandana ngaphambi kokuthi axolise esidlangalaleni kunkosikazi wakhe abanezingane ezinhlanu naye.
Uma esebhekene nesehlukaniso sakhe, u-Abidal kuzodingeka abhekane nemibuzo yokuthi u-Armand empeleni ungumzala wakhe yini phakathi nophenyo lokushushumbiswa kwezitho zomzimba.
Umthombo wesithombe: @DailyMail
.
