Dylan Bettencourt
Unozinti we-Paris Saint-Germain(PSG) uKeylor Navas uvule isithabathaba somuzi wakhe enkabeni yedolobha lase-France kubantu abangu-30 ababaleke e-Ukraine.
UNavas, kanye nomkakhe u-Andrea, bathathe abantu ababaleke ezweni labo ngemuva kokuhlasela kwe-Russia e-Ukraine. Kusukela lapho sebekwazile ukuthenga imibhede engu-30, banikeze izivakashi zabo ukudla nezingubo zokugqoka.
Abezindaba ze-Spanish SPORT babike ukuthi uNavas wathi ezwa ngesimo salaba ababaleke e-Ukraine wakhetha ukunikela ngomuzi wakhe ukuze bathole indawo yokukhosela.
“Inhlangano yama-gipsies evela endaweni yase-Gracia e- Barcelona iye e-Krakow ukuyoletha ukudla kulabo ababaleke e-Ukraine,” ngokusho kombiko.
“Ekubuyeni kwakhe uNavas wezwa ngodaba lwabantu abasuka e-Ukraine wabe esethatha isinqumo sokwamukela abantu abangu-30 emzini wakhe.”
U-Andrea ubhale ku-Instagram encenga abanye ukuthi balandele ezinyathelweni zabo futhi basize labo abadinga usizo.
“Singakwazi ukusiza lezi zingane, ezinye zihamba nonina, ezinye zihamba zodwa, abanye yintsha futhi bafike begqoke izingubo nezinto abakwazile ukuzithatha kuphela. Singanikela nganoma ikuphi ukudla okungaboli, izingubo, izinto zokuhlanzeka,”kusho unkosikazi kaNavas ku-Instagram.
“Ngidlulisa lolulwazi, ukuze bezothola uthando phakathi kobuhlungu ababhekene nabo.”
Selokhu i-Russia yahlasela i-Ukraine ngomhlaka-24 kuNhlolanja, balinganiselwa ku-3.7 million abantu base-Ukraine ababaleke kuleli. Abanye abantu cishe abangu-6.5 million basale dengwane ezweni.
Umthombo wesithombe:@GFFN