Menzi Magubane
Umgadli we-Mamelodi Sundowns, uPeter Shalulile, usesondele kakhulu ekutheni aphule irekhodi likaCollins Mbesuma lamagoli angu-25 ngesizini eyodwa.
NgoLwesibili lo mdlali wase-Namibia ushaye into ecokeme ngesikhathi i-Downs inenebula i-Golden Arrows ngo 6-0 kowe-DStv Premiership.
Bekuyigoli likaShalulile lesi-21 kule sizini kanti manje usedinga amanye amagoli amahlanu emidlalweni emihlanu esele ukuze aphule irekhodi lowayedlalela i-Kaizer Chiefs leminyaka engu-17.
Ebhekene nabafana Bes’thende, uShalulile uqale ngokuphula irekhodi likaSiyabonga Nomvethe leminyaka eyishumi lokushaya amagoli.
UNomvethe washaya amagoli angu-20 ngesizini ka-2011/12 esadlalela i-Moroka Swallows kanti ngaleso sikhathi wayesaneminyaka engu-34.
UShalulile akagcinanga ngokuphula irekhodi likaNomvethe ngoLwesibili kodwa ufake igama lakhe emabhukwini omlando we-Premier Soccer League (i-PSL) ngokuba ngumdlali wokuqala ukushaya amagoli amathathu elandelana. Ushaye into ecokeme ngoLwesithathu olwedlule washaya i-Swallows edonsa kanzima.
Usaphethe irekhodi lokuba ngumdlali wokuqala we-PSL ukushaya amagoli angu-14 kumasizini amathathu elandelana.
Amagoli akhe okuqala wawashaya ngo-2020 esadlalela i-Highlands Park kanti ngesizini edlule uphinde wakwenza kwi-Sundowns wahlabana ngomklomelo nezindondo eziningi benoGabadinho Mhango wangakubo.
Sekungokwesithathu kule sizini edlula obekulindelekile.
Ngemuva kokusiza aMasandawana ukuthi aphinde awine ngoLwesibili, kuzobe kubhekwe lukhulu kuyena kule midlalo emihlanu yeligi esele. I-Downs, eyintandokazi yokunqoba iligi okwesihlanu kulandelana kanti izokwamukela i-Cape Town City emasontweni amabili.
Kuyimanje i-Sundowns inamaphuzu angu-57 kanti uma ingawina imidlalo yeligi esele izoba namaphuzu angu-72 okuzoyenza yephule irekhodi layo.
Ngo-2015/16 i-Downs yawina iligi ngemuva kokuqoqa amaphuzu angu-71 nokube ngokokuqala nokokugcina ukuthola leso sibalo selokhu i-PSL yehlisa amakilabhu ayo esuka ku-18 aya ku-16.
I-Sundowns yaqala ukuqoqa amaphuzu angaphezu kwangu-71 ngesizini ka-1998/99 nangesizini ka-1999/2000 lapho eyawina khona iligi ngamaphuzu angu-75 ngesikhathi i-Premiership isanamaqembu angu-18.
Umthombo wesithombe: @Masandawana
.
