Celani Sikhakhane
UMfundo Mokoena, oyilungu le-ANC Youth League KwaZulu-Natal, ubengasalali emzini wakhe ngoba esaba ukuthi uzobulawa ngaphambi kokuthi kuhlale ingqungquthela yokukhetha ubuholi eThekwini.
I-Scrolla.Africa singadalula ukuthi uMokoena, odutshulwe wabulawa ngoMsombuluko ebusuku, ubehlala ezindaweni ezintathu abecashe kuzo ezinsukwini ezandulela ukubulawa kwakhe.
Umthombo obusondelene naye uthe uMokoena uthole izinsongo zokubulawa ngesikhathi kulungiselelwa ingqungquthela ye-ANC esifundeni saseThekwini.
“Bekucaca ukuthi uyazi ukuthi uzobulawa ngubani,” kusho umthombo.
Ukuphepha kukaMokoena yinto ebikhathaza abangani bakhe kanjalo nokuthinteka kwakhe emkhankasweni kaMnu Thabani Nyawose wokuba nguSihlalo we-ANC eThekwini.
Kwi-status sakhe ku-Whatsapp ukubeke kwacaca ukuthi weseka uNyawose ongase anikeze ubuholi obuthembekile nobuvivinyiwe.
UMokoena ubeyiPhini likaNobhala we-ANCYL esigcemeni sesi-67 e-Adams Mission. Udutshulwe wabulawa ngoMsombuluko ebusuku esitobhini samabhasi esiseduze nakubo kwaCele.
Kuvela ukuthi ngaphambi kwengqungquthela ube nempi enzima yamagama nabaholi nokuholele ekutheni akhathazeke ngokuphepha.
NgoLwesibili ntambama abaholi be-ANC abasanda kukhethwa eThekwini bavakashele umndeni wakhe e-Adams Mission ukuyodlulisa amazwi enduduzo.
UNobhala wesifunda eThekwini uMnu Musa Nciki uxwayise ngokuqagela okungase kuhlukanise le nhlangano phakathi.
Unxuse abanolwazi ukuthi basheshe basize amaphoyisa ukuze kuboshwe abaphehla ukubulawa kwabantu.
I-ANC isamile kwelokuthi ukushona kwakhe akuhlangene nepolitiki.
Uphiko lwentsha lwe-South African Civic Organisation eThekwini luphinde lwaxwayisa ngokuthi ukuqagela ngokushona kukaMokoena akumele kuhlanganiswe nokubulawa kwezepolitiki kuze kube amaphoyisa aqeda uphenyo lwawo.