Owe-Afro-Pop nenye eshisa izikhotha

Sizwe Sibiya

ULwah Ndlunkulu usezoba indlovukazi yomculo we-Afro-pop – ngemuva kokunika elakuleli ingoma eshisa izikhotha enesihloko esithi-“Home” ngoNhlolanja nokuthi ahambe phambili ngezingoma ezihamba phambili njengethi-“Voicemail” ayiqopha ngaphansi kwe-Inkabi Records.

ULwah Ndlunkulu owazalwa wakhulela ezingxenyeni ezisenyakatho yeKwaZulu-Natal, njengamanje uhlezi endaweni yokuqala emculweni osabalalayo ku-YouTube kanye nozakwabo abanekhono uBig Zulu, uMduduzi Ncube, uSiya Ntuli kanye noXowla. Lokhu kulandela ukukhishwa kwezithombe zengoma yabo ehlanganyelwe enesihloko esithi-“Voicemail” ngomhlaka-15 kuNtulikazi.

Ngezwi elisankondlo nothando lokubhala umculo okhuthazayo, uNdlunkulu uveze ukuthi uzokhipha ingoma ebhekwe ngabomvu enesihloko esithi “Ithuba” ayicula ngokuhlanganyela noSiya Ntuli.

Abelana ngesiqeshana sevidiyo yengoma ethi “Ithuba” ethwetshulwe yaphinde yaqondiswa u-Ofentse Mwase, ophinde waqondisa ifilimu ye-Netflix yanyakenye ethi-“Collision”, lo mculi owaduma kakhulu uthe ubonga abalandeli nenkampani eqophayo ngokumnikeza ithuba.

“Khuphuka Ndlunkulu” kuphawula uzakwabo ongumculi uBeast ekhasini likaNdlunkulu laku-Instagram ngoLwesithathu.

Nakuba i-“Voicemail” isaqhubeka nokuba phezulu isonto lesithathu kulandelana, i-Inkabi Records ibingakalumemezeli usuku lokukhishwa kwengoma ethi “Ithuba” okungenzeka kube ngenye yezingoma ezishisa izikhotha.

Umthombo wesithombe nevidiyo: Ndlunkulu_SA