Everson Luhanga
Owayengumdlali weBafana Bafana ne-Orlando Pirates kanye nabehambisana nabo baboshelwe ukugqekeza izindlu nokuduna imoto.
Umdlali ongeke adalulwe igama lakhe aze avele enkantolo uboshwe e-Lombardy East ngase-Alexandra ngoLwesibili.
Okhulumela oKlebe uColonel Katlego Mogale ukuqinisekisile ukuboshwa kwabasolwa ababili.
Uthe ithimba labo lithole ulwazi mayelana neqembu lamadoda ahlomile ahamba ngemoto yohlobo lwe-Audi ngesikhathi kudunwa izimoto kanye nokugqekezwa imizi esendaweni yaseGoli.
Uthe la maphoyisa aye e-Lombardy East lapho kubonakale khona lezi zigebengu kanti amaphoyisa azithela phezu kwazo ngesikhathi engena endaweni ezihlala kuyona abe esezibopha ngokushesha.
Amaphoyisa athole izibhamu ezintathu, izinto zokugqekeza, amagilavu, ama-balaclava, umabonakude owebiwe kanye nomakhalekhukhwini ngaphakathi emotweni yomsolwa.
“I-Audi ibinezinombolo zomgunyathi zokubhalisa futhi yadunwa e-Bramley ngasekuqaleni kwalonyaka. Kuphinde kwatholakala i-Kia Picanto kuyo le ndawo. Ibinezinombolo ezingezona futhi ihlonzwe kwatholakala ukuthi idunwe kumnikazi wayo e-Linden ngoNhlangulana,” kusho uColonel Mogale.
“Uphenyo lokuhlanganisa abasolwa nezinye izigamako zobugebengu lusaqhubeka futhi kusengenzeka ukuthi kuboshwe abanye abantu.”
Abasolwa bazovela eNkantolo yeMantshi yaseGoli ngoLwesine.