Dylan Bettencourt
I-Ukrainian Football Association (UAF) isifake isicelo sokuthi owayengukaputeni weqembu lesizwe u-Anatoliy Tymoshchuk abhekane nesijeziso ngenxa yokuthula kwakhe mayelana nokuhlasela kwe-Russia.
Ithimba liphakamise ukuthi lona owayengumdlali webhola aphucwe ilayisensi yakhe yokuqeqesha, kanye nezindondo zombuso ngenxa yokuqhubeka nokusebenza neqembu lebhola lase-Russia i-Zenit St Petersburg.
UTymoshchuk akakawugxeki umsebenzi wamasosha ase-Russia okwamanje ahlasela ezweni lakubo futhi lokhu kuyithukuthelise kakhulu i-UAF.
Lo mlisa (42), wajoyina i-Zenit St Petersburg ngo-2017 njengomsizi womqeqeshi.
UTymoshchuk ungumdlali oseqophelweni eliphezulu e-Ukraine, udlale imidlalo eyi-144 kusukela ngo-2000 kwaze kwaba ngu-2016.
Ngenkathi abasubathi abambalwa base-Ukraine beshiya izindima zabo emaqenjini ase-Russia, owayengukaputeni usenqume ukuqhubeka neqhaza lakhe kuleli qembu.
“Selokhu i-Russia yaqala ukuhlasela i-Ukraine, uTymoshchuk, akagcinanga nje ngokungenzi izitatimende zomphakathi mayelana nalokhu, kodwa futhi akazange akumise ukusebenzisana kwakhe nekilabhu yomhlukumezi,” kusho ikomidi le-UAF le-Ethics and fair Play esitatimendeni.
UTymoshchuk uthathwa njengomunye wabanethalente lebhola abaphuma e-Ukraine, owabamba iqhaza kwisizini yokuwina kathathu ye-Bayern Munich ngo-2012/13.
“Njengoba i-Bayern Munich ishicilela izitatimende futhi yenza izinto zokweseka i-Ukraine, uTymoshchuk usathule futhi usebenzela iqembu lase-Russia,” kwengeza isitatimende se-UAF.
Ithimba lezimiso zokuziphatha licele ukuba umdlali webhola likanobhutshuzwayo owayengukaputeni weqembu ngesikhathi se-Euro yango-2016 aphucwe zonke izindondo aziwina namaqembu asekhaya ngesikhathi esadlala.
Abase-Ukraine bazozizwa bebuhlungu ukubona owayengukaputeni wabo eqhubeka nokusebenzela izwe elicekela phansi isizwe sabo.
Umthombo wesithombe: @TheGuardian
.
