Dylan Bettencourt
UConstable Tumelo Masenamela uthi wahlukunyezwa kaningi ngokocansi ngumphathi wesiteshi sakhe kanti manje usephelelwe yithemba kangangokuthi usemangalele uNgqongqoshe wezamaPhoyisa uBheki Cele imali eyizigidi eziyi-R10.
UMasenamela okhulume ne-Sowetan uthathe isinyathelo somthetho esibhekiswe kuCele ngesonto eledlule ethi ufuna ukuthi akhokhelwe umonakalo ngokushaqeka ngokomphefumulo kanye nokuhlukumezeka akuthola kumphathi wakhe.
Ufuna nokuthi akhokhelwe izindleko zokwelashwa kubandakanya nokwelashwa kwengqondo.
Leli phoyisa litshele i-Sowetan ukuthi uColonel Marike Galant, umphathi wesiteshi samaphoyisa e-Letlhabile e-North West, wayelokhu emthinta ngendlela engafanele yize ayemcela ukuthi ayeke. Lezi zigameko zenzeka phakathi kowezi-2018 nowezi-2019.
Okhulumela uCele, uLirandzu Themba uthe uNgqongqoshe uzobe egagamela uma ezonikeza impendulo ngalolu daba ngaphandle kwemininingwane edingekayo.
Isisulu, nokho, sithi uNgqongqoshe wamaphoyisa wehlulekile ukwenza uphenyo ngesikhathi ebika ngokuhlukunyezwa ngokocansi.
Ngemuva kokubika ngezigameko abhekana nazo ngowezi-2018, uMasenamela uthe okuwukuphela kwesinyathelo esathathwa ngamaphoyisa kwaba ukubiza umhlangano ohlanganyelwe ukuze akhombise ukuthi wathintwa kanjani ngendlela engafanele nguGalant.
Ummeli wephoyisa uMabu Marweshe uthe: “Lesi yisigameko lapho umphathi, ongumuntu wesifazane, esebenzise amandla akhe ukuhlukumeza ngokocansi ongaphansi kwakhe futhi ngaphandle kokuthi iklayenti lethu lifake isikhalazo akukho okwenziwe”.
UGalant akazange aphawule ngezinsolo ezibhekiswe kuye.
Umthombo wesithombe: @Sowetan