Arthur Greene
Owase-Russia oqhudelana emijahweni yezimoto oneminyaka engu-15 ubudala uxolisile ngokwenza isibingelelo sama-Nazi ngesikhathi emi esiteji ngemuva kokuwina umjaho e-Portugal ngeSonto.
U-Artem Severiukhin ubonakala eshaya isifuba sakhe kabili kwisiqeshana sakumabonakude ngaphambi kokuphakamisa ingalo yakhe ngokwesibingelelo sikaHeil Hitler, nokubingelela kwaseJalimane ngendlela yama-Nazi esemthethweni okwakwenziwa ngesikhathi seMpi Yesibili yoMhlaba.
Eminyakeni yamuva nje, lokho kubingelela kumele ukuhlukumeza okwedlulele futhi kwamukelwa ngabalandeli bamaqembu e-neo-nazi kanye nezombusazwe ezenza izinto ngendlela ehlukile.
USeveriukhin uye waxoshwa ngemuva kwesigameko yiqembu lakhe i-Ward Racing futhi uphenyo ngalolu daba luvulwe yi-FIA okuyinhlangano elawula umhlaba we-motorsport.
NgoMsombuluko, uSeveriukhin uye wafaka ividiyo abexolisa kuyo ngokwenza lesi senzo.
Ekhuluma ngesiRashiya, uthe: “Ngifuna ukuxolisa. Angikaze ngisekele ubu-Nazi futhi ngibuthatha njengobugebengu obubi kakhulu obubhekiswe kubantu. Sengikulungele ukujeziswa kodwa angibusekeli ubu-Nazi noma ubuphekula,” usho kanje.
Iqembu elizinze e-Sweden, i-Ward Racing likhiphe isitatimende libika ukuthi lizonqamula ubudlelwano balo noSeveriukhin.
“Izenzo zika-Artem Severiukhin ngesikhathi somcimbi wokuklomelisa ngemuva komzuliswano wokuqala woMqhudelwano WaseYurophu, bekungezakhe yedwa futhi azimele imibono namagugu e-Ward Racing nganoma iyiphi indlela,” kufundeka isitatimende.
“Ngokuphambene nalokho, i-Ward Racing ime nomphakathi wamazwe omhlaba ukugxeka ukuhlasela kwe-Russia e-Ukraine futhi izwakalisa ubumbano lwayo nabantu abahluphekayo ngenxa yalokhu kuhlasela okungadingeki nokuhlasimulisayo.”
Esitatimendeni i-Ward Racing ithe ayiboni ukuthi kungenzeka iqhubeke nokusebenzisana noSeveriukhin.
“Sizoqhubeka nokunqamula inkontileka yakhe yemijaho,” besho.
Umthombo wesithombe: @F1FeederSeries1
.
