Dylan Bettencourt
UKobus Olivier waya e-Ukraine ngemuva kokuthatha umsebenzi ne-Ukraine Cricket Federation (UCF) ekuthuthukisweni kwekhilikithi eminyakeni embalwa edlule – kodwa ubengakaze acabange ukuthi engazithola evaleleke endaweni enempi.
Njengoba amasosha ase-Russia esondela e-Kyiv, u-Olivier uzithola ezivalele endlini yakhe nezinja zakhe ezine kanye nokudla okuzomgcina inyanga.
U-Olivier, oyisikhulu esiphezulu se-UCF, uthe izinja zakhe yizona ezimgcina ephilile kanye nephupho lakhe lokuthi i-Ukraine ibe yilungu le-International Cricket Council ngoNtulikazi.
“Ngizama ngakho konke enginakho ukubhekana nalesi simo,” etshela i-Reuters.
“Anginaso isibindi. Ngithukile impela kodwa akukho engingakwenza. Kunjena nje”.
U-Olivier uthe ubale iziqhumane ezingu-19 ngesikhathi ehamba nezinja zakhe ngosuku i-Russia ehlasele ngalo. Kusukela lapho, uye wabeka omatilasi emafasiteleni ukuze avimbele izingilazi eziphahlazekile ukuthi zingangeni efulethini.
Lo mdlali waseNingizimu Afrika uhambe kakhulu futhi wayeyisikhulu sekhilikithi e-Kenya ngaphambi kokuthi athande i-Kyiv eminyakeni emine edlule.
“Sengihambele amazwe angu-38, kodwa i-Kyiv kimina iyisipiliyoni esiyingqayizivele. Ngithanda isiko, umlando, nokudla kwakhona,” esho.
“Ubaba washonela lapha ngakho-ke kunginika ubudlelwano obuqinile ne-Kyiv. Noma yini eyenzekayo namuhla noma kusasa, angeke ngishintshe lutho”.
Ukuhola ka-Olivier kwi-UCF kudale ukuthi kukhule nenani labafundi babangu-15,000 ohlelweni lwayo. Izwe liphinde labasemathubeni okuba yilungu lesigungu esilawula ikhilikithi esizobabona bethola izibonelelo kule nhlangano.
“Kuzoheha uxhaso kuphinde kugqugquzele abantu balapha ukuthi badlale lo mdlalo. Kuzoshintsha umdlalo,” kusho u-Olivier (62), ngeSonto.
Ekhuluma ne-Chiswick Calendar podcast, uthe isimo e-Ukraine sishintsha ngehora.
“Iqiniso wukuthi emahoreni ambalwa alandelayo izinto zizoshintsha ngokuphelele, amasosha ase-Russia anamathangi, azongena e-Kyiv emahoreni ambalwa azayo. Njengoba ngihlezi lapha. Kuzoba yinkinga,” esho.
Umthombo wesithombe: @EmergingCricket
.
