Dylan Bettencourt
Ingwe yaseTasmanian sekuneminyaka yafa kodwa ososayensi base-Australia naseMelika banethemba lokuthi bazoyivusa.
Ingwe yokugcina eyaziwayo yase-Tasmanian kuthiwa yafela e-Hobart Zoo ngo-1936.
Kodwa manje iphrojekthi ezothatha izigidi zamadola emali iletha ithemba lokuvusa kabusha isilwane kusetshenziswa ama-stem cell kanye nobuchwepheshe bokusebenzisa ulibofuzo, ngokusho kwe-BBC.
Ithimba labacwaningi lithi ingwe yokuqala yase-Tasmanian yalo msebenzi ingase idedelwe endle eminyakeni eyishumi ezayo.
Ososayensi bazosebenzisa ama-stem cells ohlobo oluphilayo olunolibofuzo olufanayo bese besebenzisa ubuchwepheshe bokuhlela ukwakha kabusha lesi silwane.
USolwazi u-Andrew Pask ongumholi wethimba labacwaningi eNyuvesi yase-Melbourne uthe bakholelwa ukuthi eminyakeni eyishumi bangaba nengane yabo yokuqala ephilayo ye-thylacine.
“Zazingelwa zaze zashabalala cishe eminyakeni engamakhulu adlule.”
Inani lezingwe zase-Tasmania lancipha ngesikhathi abantu befika okokuqala e-Australia nama-dingo uhlobo lwenja zasendle.
Izingwe zagcinwa zizulazula esiqhingini sase-Tasmania ngaphambi kokuba zizingelwe zize ziphele.
Uma ithimba labacwaningi lizophumelela bekuzoqopheka umlando, kodwa kunokungabaza ukuthi kuzokwenzeka.
“Lokhu kuyingwanekwane,” kusho uSolwazi uJeremy Austin ovela e-Australian Center for Ancient DNA etshela i-Sydney Morning Herald.
Uthe lo msebenzi umayelana nokunakwa kwabezindaba kunesayensi uqobo.
Izinhlelo zokubuyisa ingwe yase-Tasmania azizintsha. Ngo-1999 i-Australian Museum yabheka iphrojekthi yokuzama ukufanisa lesi silwane.
Iphrojekthi yamanje iwukubambisana phakathi kososayensi baseNyuvesi yase-Melbourne kanye nenkampani ezinze e-Texas i-Colossal.
Le nkampani yaseMelika yaba sematheni ngonyaka odlule imemezela ukuthi ifuna ukubuyisela i-woolly mammoth ekuphileni, kodwa lokho abakakwenzi.
Umthombo wesithombe: @TheNewYorkTimes