Oseka uRamaphosa kwesiphezulu se-ANC e-Free State 

Lubhalwe nguLungani Zungu

Kuqokwe uSihlalo omusha we-ANC e-Free State.

UMnu Mxolisi Dukwana ongumeseki omkhulu kaMengameli uCyril Ramaphosa kulesiya sifundazwe uqokwe  njengoSihlalo we-ANC esifundazweni engqungqutheleni ebishubile ngeSonto.

UDukwana uwine ngamavoti angu-43 ngemuva kokuthola amavoti angu-346 uma kuqhathaniswa namavoti angu-303 kaNdunankulu uSisi Ntombela.

Bonke abebesohlangothini lukaDukwana baphumelele.Manje bahlelelwe umsebenzi omkhulu wokubumba isifundazwe esihlakazekile.

UToto Makume uqokwe njengephini likasihlalo ngamavoti angu-346 kwathi uThabo Manyoni wathola amavoti angu-307.

UPoleliso Motsoeneng unguNobhala omusha wesifundazwe kanti uDibolelo Mahlatsi nguyena ozothatha izintambo njengePhini likaNobhala.

UMathabo Leeto uqokwe njengomgcinimafa omusha.

Ukukhethwa kukaDukwana esikhundleni se-ANC esinamandla kakhulu kungase kusho ukuphela kwesikhundla sikaNtombela njengoNdunankulu wase-Free State.

UNtombela nabahluliwe abebehambisana naye bangabalandeli baka-Ace Magashule owayenguNobhala-Jikelele we-ANC nowake waba nguNdunankulu wase-Free State.

Ukwehlulwa kwabo kuyinkomba ecacile yokuthi amandla kaMagashule asephelile  kanti manje sekuvuna uDukwana owathi uMagashule uzama ukuqeda ipolitiki.

Le ngqungquthela ihlaselwe uchungechunge lokuhlehla ngenxa yezingxabano phakathi kwamaqembu alwayo e-Free State.

Lesi sifundazwe – okwazalelwa kuso i-ANC ngo-1912 – saya engqungqutheleni yokukhetha ubuholi yesi-55 ngoZibandlela ngaphandle kohlaka olukhethiwe ngenxa yokuhlehliswa.

Uqhekeko luphinde lwaphumela obala ngoLwesihlanu ngesikhathi kubambezeleka ukuqala kwengqungquthela ngemuva kokuthi abanye bephazamise ukuqhubeka kwezinhlelo ngesikhathi kubhaliswa.

UDukwana uke waba nguNgqongqoshe wezokuBusa ngokuBambisana neziNdaba zoMdabu.

Ngesikhathi ubudlelwano bakhe noMagashule buba muncu wadalula amahlazo kaMagashule.

UDukwana waze wahlela amamashi ukuyokweseka icala lenkantolo le-asbestos lika-R255 million elibekwe uMagashule i-National Prosecuting Authority.

UMagashule uvele enkantolo ngesonto eledlule, kanti icala lihlehliselwe umhla zinhlanu kuNhlaba.

UDukwana waphinde wethula ubufakazi kwikhomishini ebiphenya ngezinsolo zokugwamandwa kombuso.

UDukwana waba umgqugquzeli we-ANC e-Free State kusukela ngo-2018 kwaze kwaba nguNhlaba ngo-2021.

Esithombeni esingenhla: USihlalo omusha we-ANC e-Free State uMxolisi Dukwana

Umthombo wesithombe: Facebook ANC Free State

Izihloko zakamuva