Lubhalwe nguSihle Mavuso
Omasipala basekhaya abangu-44 KwaZulu-Natal babhekene nengwadla enkulu njengoba sekumele babuyisele abathengi bagesi imali abayikhokhiswa kusukela ekuqaleni kukaNtulikazi.
Kusukela komasipala abampofu ezindaweni zasemakhaya ezingenawo ama-rates kuya kwabenza kangcono emadolobheni, lokhu kungase kubalahlekisele izigidi zamarandi.
Inkinga iqhamuke ngemuva kokuthi i-AfriForum ifake i-Nersa (National Energy Regulator of South Africa) enkantolo, yanqoba.
I-AfriForum iveze ukuthi akukho emthethweni ukuthi omasipala banyuse intela kagesi ngaphandle kokubalwa kwezindleko zokuhlinzeka ngawo ugesi.
Ngesonto eledlule, i-Nersa yehlulekile emizamweni yayo yokunxenxa inkantolo ukuthi idlulise isinqumo sayo iNkantolo eNkulu yase-North Gauteng.
Ngokwemibiko ye-BusinessTech, i-AfriForum isiveze ukuthi izofaka isicelo sokuthi kubo bonke omasipala abangu-112 ezweni lonke abasebenzisa lezi zinhlelo babuyisele imali yabathengi.
Ngokwesinqumo senkantolo bathathu kuphela omasipala KwaZulu-Natal abakwazile ukulandela ngokuqinile umthetho nokwenza ucwaningo oludingekayo.
Labo ngomasipala, owaseThekwini (eThekwini), uMhlathuze (Richards Bay-Empangeni) nomasipala waKwaDukuza (Stanger).
Omasipala bendawo badayisela abathengi ugesi ngemuva kokuwuthenga kwa-Eskom.
Yize iTheku lithathwa njengesifunda sesi-11 esifundazweni, liphinde lithathwe njengomasipala, okwenza likwazi ukujabulela amalungelo kamasipala wendawo.
Phakathi komasipala okungase kudingeke ukuthi babuyisele imali yabo abathengi bagesi kubalwa uMsunduzi (eMgungundlovu, inhlokodolobha yesifundazwe), i-Alfred Duma (e-Ladysmith), Ray Nkonyeni (e-Port Shepstone), i-Newcastle, u-Pongola, iJozini, uMtubatuba, Umsinga, noMvoti (e-Greytown).
Esithombeni ngenhla: I-Nersa yehlulwe enkantolo ibhekene ne-AfriForum.
Umthombo: Facebook