Lubhalwe nguDylan Bettencourt
Umculo wakuleli wama-piano usuhlasele umhlaba wonke futhi uzobonakala emicimbini yomculo edume kakhulu e-North America ngoMbasa.
ULungelihle Zwane odume ngelikaDJ Uncle Waffles nochazwa njengentokazi ehamba phambili kuma-piano uzobe ephephezelisa ifulegi lakuleli emcimbini omkhulukazi we-Coachella eMelika.
Lo DJ onomdlandla waduma ngasekupheleni kuka-2020 futhi lokhu akhuphuka kusukela ngaleso sikhathi. Lesi simemo sokuyonandisa emcimbini ozobe usogwadule lwase-California sikhulu kakhulu emsebenzini wakhe kuze kube manje.
U-Uncle Waffles ufake uhlu lwabaculi ekhasini lakhe laku-Twitter namagama-ncazo athi: “Ukukhala … ukuhlanza … ukuklabalasa!”
U-Uncle Waffles wake wabandakanyeka endabeni ye-Instagram eyayibhalwe umrepha odumile uDrake kodwa manje ukuyonandisa e-Coachella kuzoba into ephezulu ohlwini lwakhe lwempumelelo.
Lo mcimbi uzokwenzeka ngezimpelasonto zangomhlaka-14-16 kuMbasa nangomhlaka-21-23 kuMbasa.
Idlanzana labantu bakuleli lihalalisele u-Uncle Waffles ngokuthola lesi simemo bencokola ngokuthi bazimisele ukudayisa imizi yabo ukuze bathenge amathikithi.
Ithikithi lokuyobona u-Uncle Waffles lizobiza cishe u-R10 500 ngempelasonto yokuqala yomcimbi okuyiyo azobe anandisa kuyo.
Ukwenza lesi simemo sibe mnandi nakakhulu ukuthi u-Uncle Waffles ngeke kube nguye yedwa usaziwayo wakuleli ozocula kulo mcimbi wodumo.
UDJ Kyle Watson naye umenyiwe ukuthi azodlala ku-Coachella.
Laba bazojoyina uhlu lwabaculi bakuleli abake bacula kulo mcimbi okubalwa kubo i-Major League DJz kanye noBlack Coffee.
I-Coachella ingenye yemicimbi ethandwa kakhulu emhlabeni wonke kanti uhanjelwa ngabantu abalinganiselwa ku-750,000 nyakenye.
Umrepha wase-Spain uBad Bunny uzoba sematheni ngempelasonto njengoba ezobe enandisa noGorillaz, uBlondie kanye nomrepha wase-Nigeria uBurna Boy.
Esithombeni esingenhla: U-Uncle Waffles
Umthombo wesithombe: City Press