Obegibele ibhasi ubanjwe namayunithi angu-6,000 ezidakamizwa

Lubhalwe nguBuziwe Nocuze

Amaphoyisa athole amaphasela angaphezu kuka-6,000 ezidakamizwa ezibizwa nge-khat efihlwe emithwalweni yebhasi ngemuva kokumisa umgibeli osolisayo e-Beaufort West.

Ibhasi beliya e-Western Cape lisuka e-Gauteng. 

Amaphoyisa abophe owesilisa oneminyaka engu-46 ubudala nezinkulungwane zamaphasela e-khat ebezifihlwe emithwalweni yebhasi labagibeli elisuka e-Gauteng liya e-Western Cape.

Amaphoyisa abophe lo wesilisa ngesikhathi ehlola imoto e-Beaufort West weighbridge ngeSonto ngemuva kokulunywa indlebe.

Okhulumela amaphoyisa ase-Western Cape uWarrant Officer Joseph Swartbooi uthe bebenolwazi ngomuntu oshushumbusa izidakamizwa phakathi kwezifundazwe emgwaqeni onguthelawayeka u-N1.

“La malungu enze umkhankaso wokumisa nokusesha ebhulohweni lokukala isisindo. Ngezithuba zabo-07:20, bamise ibhasi elisolisayo basesha indawo yemithwalo. Ukuphikelela nokubekezela kwabo kubasebenzele ngesikhathi bethola amaphasela asolisayo efihlwe phakathi kwemithwalo. ” kusho uSwartbooi.

Amaphoyisa athole amayunithi angu-6,030 e-khat ngemuva kokuvula amaphasela.

“Amaphoyisa abuze abagibeli imibuzo, ngokushesha iminwe yakhomba kowesilisa (46), waboshwa amaphoyisa ngokushushumbisa izidakamizwa,” kusho uSwartbooi.

Umsolwa uzovela eNkantolo yeMantshi yase-Beaufort West uma esethweswe icala.

UTabisa Mlenze (50), uthi ukutholwa kwezidakamizwa kubuyisa imicabango ebuhlungu ngendodana yakhe eyaba umlutha wezidakamizwa.

“Ngiyabazonda bonke abantu abathengisa izidakamizwa, indodana yami isiwumlutha wezidakamizwa ngenxa yabo. Laba abadayisa izidakamizwa abananhliziyo futhi banendaba nemali kuphela bakhohlwe ngabazali abacindezelekile, abahlukunyezwe yizingane ezidla izidakamizwa. Ngiyethemba ukuthi oboshiwe ngeke ayithole ibheyili,” kusho uMlenze.

Esithombeni esingenhla: Umgibeli webhasi uboshwe e-Beaufort West ngokudayisa izidakamizwa; ubehambisa izidakamizwa phakathi kwe-Gauteng ne-Western Cape.

Umthombo: Sithunyelwe

Izihloko zakamuva