Menzi Magubane
Njengoba eza ekupheleni komsebenzi wakhe , abantu bayabuza ukuthi ukaputeni we-Barcelona uLionel Messi ulahlekelwa ingqondo yini ngemuva kokuba umzuzwana wokungaziphathi kahle kwakhe umnikeze ikhadi elibomvu lokuziphatha ngodlame ngeSonto ebusuku.
UMessi wanikezwa umuyalelo wokuthi aphume enkundleni okokuqala ngqa eqenjini lakhe ngemuva kokubanjwa yi-VAR ehlose ekungena kabi umdlali we-Athletic Bilbao u-Asier Villalibre.
Kube yisigameko sebhola kodwa umzuzu wakhe wokuhlanya wabanjwa yi-VAR. Kulowo mdlalo i-Barcelona yahlulwa ngamagoli amathathu kwamabili esikhathini esengeziwe idlala ne-Bilbao kowamanqamu ku-Spain Super Cup.
Wayesengazithola esenkingeni enkulu ne-Spanish Footballing Body.
Isikhathi sikaMessi silokhu siba sibi kakhulu. Kuyazwakala ukuthi kuleli sonto ikomidi elibukeza i-La Liga lizohlala ukudingida okwenzekile kulo mdlalo nokuthi uma uMessi etholakala enecala anganqatshelwa ukudlala imidlalo emine.
Ku-Article 56.8 yemithetho ichaza ukuthi ukumiswa okuthathwe kwi-Spanish Super Cup kuzoqhubeka nasemidlalweni elandelayo yasekhaya. Lokhu kusho ukuthi uMessi uzophuthelwa umdlalo we-Copa del Rey we-Barcelona ibhekene ne-Cornella bese kuba umdlalo owodwa we-Copa uma ingubo yase-Catalan iqhubeka.
Uma i-Barca ihlulwa, uMessi uzovinjelwa ukudlala okungenani imidlalo emithathu ye-La Liga.
“Kubonakale ngathi ulaka olucace bha kuMessi. Ngafaka umzimba wami endleleni, wathukuthela wangishaya ebusweni ngesandla,” kusho uVillalibre etshela abezindaba ngemuva komdlalo.
Ikusasa likaMessi belingumthombo wokuqagela njalo muva nje, futhi kusazobonakala ukuthi uphelela kuphi ekupheleni kwesizini, nenkontileka yakhe okumele iphele ngoNhlangulana. Lo mdlali wase-Argentina ukubeke kwacaca kule sizini ukuthi ufuna ukuphuma kuma-Catalan waze wanikela nangokuzithenga ngenkontileka yakhe.
UMessi usethole amakhadi abomvu kathathu emsebenzini wakhe. Okokuqala kwaba ngowezi-2005 emdlalweni wakhe wokuqala e-Argentina bedlala ne-Hungary.
Isikhathi sesibili kwakungowezi-2019 edlalela i-Argentina kodwa kulokhu edlala ne-Chile kuCopa America. Okwesithathu bekungeSonto.
Isithombe: @iolsports