Ngabe uCheslin Kolbe ungumdlali ohamba phambili emhlabeni?

Umdlali ophambili wamaBhokobhoko uCheslin Kolbe udlale ngokukhulu ukuzimisela emdlalweni onqotshwe yiqembu lase-France i-Toulouse ngempelasonto.

Uthole ama-try amabili njengoba behlula iqembu lase-Ireland i-Ulster ngamaphuzu angama-36 kwayi-8.

Iphephabhuku lebhola lombhoxo laseNingizimu Afrika libike ukuthi, kwifomu yamanje uKolbe ungumdlali webhola lombhoxo ohamba phambili kunabo bonke emhlabeni.

Kulesi sikhathi esiphazanyiswe yi-Covid-19, uMatt Lewis webhola lombhoxo laseNingizimu Afrika ubhale ukuthi, uKolbe wayenamathuba onke okuqokwa njengomdlali ovelele emkhakheni webhola lombhoxo emhlabeni jikelele.

Iphephandaba laseBrithani i-The Times nalo limbeke phakathi kwabadlali abaphambili emhlabeni.

Abantu bokugcina baseNingizimu Afrika abambona uKolbe, kwakungesikhathi lapho egijima enqenqetha ezungeze umugqa ongemuva wamaNgisi ukuthola i-try yokugcina kumdlalo wamanqamu weNdebe yoMhlaba obuse-Japan ngonyaka owedlule.

Ubevutha engabaselwe kula masonto ambalwa edlule, ethola izindondo ezivela kude nakude ngemidlalo yakhe.

Yize emncane impela kumamitha ayi-1,7 ukhombisa ukuthi cishe akanakuvinjwa.

Indoda ethobekile, uKolbe uthe ngemuva komdlalo: “Ukushaya ama-try kuhle kakhulu, kufana nokuqeda into obuyiqalile, kodwa kufanele nginikeze udumo kozakwethu. Ngaphandle kwabo, abadlali abadlalela emaceleni abayilutho.”

UKolbe uvela emndenini wezemidlalo.

Umzala wakhe nguWayde van Niekerk, ongumpetha wamanje kuma-Olympic amamitha angama-400.

Ividiyo: Twitter (@Murray_Kinsella)