Namanje ama-Zupta asayibambe ngobhongwana i-ANC

Lungani Zungu

U-Ace Magashule uyaqhubeka nokunqoba imibono ka-Ramaphosa kwi-ANC waphinde wasinda komunye umhlangano wekomidi eliphezulu leqembu.

UMagashule ohola uhlangothi lukaZupta ku-ANC usabise i-NEC ukuthi izethule nayo.

Ikhomishini yezobuqotho kuzwelonke yeqembu ibe neseshini yokuxoxisana noMagashule ephele ngesincomo sokuthi unobhala weqembu aphoqeleke ukuba aphume esikhundleni kuze kube kulungiswa izimpi zakhe zomthetho.

UMagashule ubekwe icala lokukhwabanisa nenkohlakalo esigamekweni sokukhishwa kwethenda yemali eyizigidi ezingama-R250 e-Free State.

Sekuphele izinyanga i-ANC ilwa nokufezeka kwesinqumo sengqungquthela yayo edlule esidinga ukuthi abaholi bashiye izikhundla zabo uma bebekwa icala ngamaphoyisa.

UMagashule ozethembayo utshele abakwa-Scrolla.Africa ukuthi ngeke anqotshwe yingcindezi yokuthi ehle esikhundleni.

“Angiyi ndawo. Ngiyilungu le-ANC elinesimo esihle futhi ngeke ngisatshiswe ngokuthi ngiphume ehhovisi.”

Isikhathi sakhe seminyaka emihlanu sizophela ngonyaka ozayo.

Ufunge wagomela ukuthi uzoqhubeka nokulwa, echaza okwenzeka ngaphakathi eqenjini elibusayo “njengempi yezepolitiki.”

UMagashule uthe uyabazi abantu abaphehla udweshu loluthi ahambe.

“Akukaze kuzwakale ku-ANC ukuthi ilungu elikhethiwe lizotshelwa ukuthi lishiye phansi ngabezindaba.”

UMagashule uthe uzoshiya eceleni uma etshelwa ngamagatsha e-ANC ukuthi enze njalo.

Kulindeleke ukuthi abuyele eNkantolo yeMantshi yase-Bloemfontein ngoLwesihlanu.

Usabambele entulo nokho ngokuthi umsulwa.

Khonamanjalo umlingani wakhe wezepolitiki, uJacob Zuma, kulindeleke ukuthi avele phambi kwekhomishini kaZondo namuhla.

UZuma ukhiphe isitatimende esithi ngeke alandele umyalelo oqondile ovela eNkantolo yoMthethosisekelo emyalela ukuthi abambisane ne-State Capture Commission of Enquiry.

UZuma usamile kwelokuthi iPhini leNhloko yamaJaji uRaymond Zondo, ongusihlalo weKhomishini, ungumngani womndeni.