Lubhalwe nguZukile Majova
Umhleli wezepolitiki
Sekuhlukenwe kathathu embangweni wokulawula idolobha laseGoli lika-R90 billion.
Ukubusa idolobha laseGoli akusekho ezandleni ze-ANC ne-DA. I-ActionSA ihola umfelandawonye omusha wamaqembu aphikisayo futhi iqoke umholi we-ActionSA e-Gauteng uFikeni Ngobeni njengongenele ukhetho.
Lokhu kuvele ngemuva kokuhlukana kombimbi oluholwa i-DA.
UNgobeni uthe amaqembu aphikisayo asenziwe buthaka i-DA engakwazi ukusebenzisana kahle namanye amaqembu.
“Ukuntengantenga kwakamuva kungenxa yokuthi i-DA yanqaba ukufaka i-PA kumfelandawonye wethu. Ngemuva kwalokho, njengoba singena kulo mhlangano womkhandlu, i-DA yathatha isinqumo sokuthi izoqoka owayo umuntu ngaphandle kokuxoxisana nabanye ababesebenzisana nabo.”
“Inkinga ingamaqembu ezepolitiki nabaholi abangakwazi ukusebenzisana ukuze kwakhiwe umbimbi.”
Umfelandawonye omusha ohlanganiswe i-ActionSA, i-IFP, i-FF-plus, i-ACDP kanye ne-UIM banethemba lokuthola amavoti anele ukuze bawine umzuliswano wokuqala walo mqhudelwano wokukhetha iMeya.
Umzuliswano olandelayo uvotele ukubunjwa kwekomidi leMeya, elidinga ngaphezu kuka-50% wezihlalo zomkhandlu.
NgoZibandlela ngo-2021, uDkt Mpho Phalatse we-DA waphatha idolobha ngamavoti angu-26% wabe esexoxisana nozakwabo ukuze bakhe umfelandawonye ozobusa idolobha.
Umfelandawonye we-ANC ne-EFF namanje awukavumelani ngomuntu ozoqokelwa esobuMeya.
Njengamanje akungabazeki ukuthi i-DA inamandla njengoPhalatse.
Njengoba i-ANC ihlome ngamavoti angu-33% kuphela emkhandlwini onabantu abangu-270, ungalindela ukuthi uPhalatse we-DA athathe izintambo zobuholi ngoLwesihlanu.
UPhalatse uke wafika lapha.
Ngemuva kokhetho loMasipala lwango-2021, wahola umfelandawonye wamaqembu aphikisayo ahlanganisa i-DA, i-ActionSa, i-IFP, i-ACDP, i-FF-Plus, ne-Patriotic Alliance.
Uma i-DA izibona ingase ihole ohulumeni bamadlelandawonye, kumele ifunde ukusebenzisana nabanye.