Abantu abaningi ezinkundleni zokuxhumana bafisa ukukhulisa u-Aya ofike emhlabeni ngesikhathi sokuzamazama komhlaba e-Turkey ngoMsombuluko ekuseni.
U-Aya uzalwe ekuseni ngesikhathi kuzamazama umhlaba okube ngu-7.8 magnitude okubhidlize ikhaya lakhe. Utakulwe kwimfucuza ngoMsombuluko.
U-Aya ngesi-Arabhu kuqonde uphawu oluvela kuNkulunkulu”.
Ingane iyona kuphela esindile emndenini njengoba bobabili abazali bayo nezingane zakubo ezine beshone ngesikhathi kuzamazama umhlaba.
Kusabalale ividiyo ku-Twitter, ekhombisa owesilisa ephuma kwimfucuza nengane egcwele uthuli futhi inkaba isanamathele esiswini.
U-Aya uthole ukunakwa okuningi ezinkundleni zokuxhumana njengoba abantu abaningi beveze elokuthi bafisa ukumkhulisa.
“Ngifuna ukukhulisa u-Aya. Ngizomnika ikhaya elinothando kanti uzoba nogogo nomkhulu kanye nabazala asebekhulile. Umndeni wami uzobe usuphelele ngaye,” kubhala omunye osebenzisa u-Twitter.
“Ngikude kakhulu, kodwa ngingathanda ukumkhulisa futhi ngingaqinisekisa ukuthi uthola impilo ejabulisayo nenokuthula,” kubhala omunye ku-Twitter.
U-Aya unakekelwa esibhedlela esiseduze umphathi uKhalid Attiah nonkosikazi wakhe, kubika i-BBC.
Unkosikazi kaKhalid, onengane enezinyanga ezine ubudala uncelisa u-Aya.
Kuze kufike umndeni wakhe okude ngizomphatha njengengane yami,” kusho uKhalid.
Uphinde wengeza ngokuthi akafisi u-Aya athathwe abanye abantu.
Umalume ka-Aya, uSalah al-Badran uthe uzomthatha uma esephumile esibhedlela.
Udokotela wezingane uHani Maarouf uthe u-Aya ufike esibhedlela esesimweni esibucayi njengoba izinga lokushisa lomzimba wakhe lehlile.
“Ukube kuphele elinye ihora engatholakalanga ubezoshona,,” kusho uMaarouf etshela i-AP.
UMaarouf wengeze ngokuthi u-Aya usesimweni esingcono.
Inani lokushona kwabantu ngenxa yokuzamazama komhlaba okuhlasele i-Syria ne-Turkey selidlule ku-22,000 kusukela ngoLwesihlanu mhla ziyishumi kuNhlolanja.
Luhlanganiswe nguDylan Bettencourt
Isithombe esingenhla: Usana u-Aya esibhedlela
Umthombo wesithombe: Twitter