Joyina uRazeen Gutta embikweni wamasonto wonke wokufuduka kwabadlali okwenzeka kuleli kanye naseYurophu.
UCristiano Ronaldo engase egcine evunyelwe ukushiya i-Manchester United inqobo nje uma umqeqeshi u-Erik Ten Hag ekugunyaza ukuhamba kwakhe.
Khonamanjalo uWesley Fofana ucele ukushiya i-Leicester City kanti isihlabani seBafana Bafana uTashreeq Matthews ufunwa i-Sirius yase-Sweden. Nakhu okwakamuva.
EYurophu
Ngemuva kokuba endaweni yokugcina kwi-Premier League okokuqala eminyakeni engu-30 kulandela ukuhlulwa emidlalweni yayo emibili yokuqala, i-Manchester United isaqhubeka nokulwa nekusasa lesihlabani sayo uRonaldo.
Njengoba leli qembu lisamile kwelokuthi lo mdlali wase-Portugal akadayisi, i-Sky Sports sesibike ukuthi leli qembu liya ngokuthamba futhi uma uTen Hag evuma uzovunyelwa ukuthi ahambe.
Kubikwa ukuthi umgadli we-Atletico Madrid uMatheus Cunha ufunwa i-Manchester United njengoba lo mdlali wase-Brazil (23) kuthiwa ubiza u-£42 million (u-R840 million).
Ngasohlangothini lwe-Manchester izinto zibonakala zimhambela kahle uPep Guardiola njengoba engeza omunye umdlali eqenjini lakhe. Kulokhu i-City ikuqinisekisile ukusayina kowayengumdlali wasemuva we-Barcelona uSergio Gomez ngesivumelwano sika-£11 million (u-R220 million) esizomenza avale isikhala sika-Oleksandr Zinchenko oshiye i-Arsenal ekuqaleni kwewindi lokufuduka kwabadlali.
Ngaphesheya kwe-UK e-Leicester, kubikwa ukuthi uFofana utshele uBrendan Rodgers ukuthi ufuna ukushiya leli qembu kanti i-Chelsea inentshisekelo ngalo mdlali wasemuva (21).
Lo mdlali wase-France ubhekwe njengomdlali wokugcina ofunwa uThomas Tuchel ngemuva kokuhamba kuka-Andreas Christensen kanye no-Antonio Rudiger.
I-Blues ifuna uCesare Casadei osuka kwi-Inter kanti kubikwa ukuthi isivumelwano sokusayinisa lo mdlali (19) u-£12 million (u-R240 million).
I-Besiktas ifuna ukusayinisa uDele Alli ngokusho kukaFabrizio Romano, kanti lo mdlali we-Everton ufuna ukudlala imidlalo eminingi kule sizini.
Lo mdlali (26) uqale ukudlala kwi-Goodison Park ezinyangeni eziyisikhombisa ezedlule kanti kuzoya ngezingxoxo ukuthi uyabolekwa yini noma ufuduka unomphela.
ENingizimu Afrika
Ezindabeni zakuleli, owayengumdlali we-Ajax Cape Town uMatthews usesayiniswe iqembu lase-Sweden i-IK Sirius. Lo mdlali (21) owake wagijima kweleBafana labaneminyaka engaphansi kuka-20 usayine isivumelwano seminyaka emine ehlezi e-Sweden ngemuva kokuhlala iminyaka emibili e-Varbegs.
IMamelodi Sundowns isikuphothulile ukusayinisa u-Abubeker Nassir we-Ethiopian Coffee SC kanti engase ebonakale ngoLwesithathu uma iSundowns isibhekene neTS Galaxy.
UNassir ubezilolonga neSundowns kusukela ngoNtulikazi kanti ugcine ethengwa yileli qembu futhi lokho kujabulise abalandeli.