Sizwe Sibiya
Ngemuva kwesizini yokuqala ebe impumelelo, uNtombezinhle Jiyane ongusomabhizinisi wesifazane nongunina wezingane ezimbili uzobuyela esiteshini se-DStv i-BET Africa ngesizini yesibili yohlelo lwamabonakude i-The Unexpected.
UNtombezinhle udume ngelikaDJ Zinhle odabuka e-Dannhauser KwaZulu-Natal uzobe etshengisa ababukeli impilo ayiphilayo kusukela kwezamabhizinisi kuya ekubeni ngumama.
“Le sizini yesibili elindelwe ngamehlo abomvu yesizini ka-#DJZinhleBET izovela mhla ziyisithupha kuNcwaba,” kumemezele isiteshi ngoLwesithathu ngomhlaka-13 kuNhlangulana.
Abalandeli balindele lukhulu njengoba isizini iphele uZinhle eveze izindaba zokukhulelwa kwakhe emndenini wakhe bukhoma kulolu hlelo, uPearl Thusi noNomuzi Mabena bemeseka njengabangani bakhe abakhulu.
Okwenza uhlelo lukaZinhle lwempilo yakhe luhluke kwezinye izinhlelo zangempela zosaziwayo ukuthi luphinde lungene ezimpilweni zabanye osaziwayo ababili oyise bamadodakazi akhe amabili.
Umrepha ongundabamlonyeni u-Kiernan “AKA” Forbes unguyise wezibulo lakhe uKairo, kanti uMurdah Bongz oyingxenye yohlelo nomlingani kaZinhle aphinde abe yingxenye yeqembu lomculo i-Black Motion Duo of DJs with Smol ungubaba ka-Asante ingane kaDJ Zinhle yesibili.