Lubhalwe nguLungani Zungu
Njengoba uMengameli uCyril Ramaphosa elwela ukuzihlenga kwezombusazwe phakathi nomlilo ovuthayo wodaba lwe-Phala Phala iPhalamende lihlehlise inkulumo-mpikiswano yombiko wethimba lomthetho wesigaba-89 kuze kube ngoLwesibili oluzayo.
Ingxoxo ngodaba lwe-Phala Phala bekumele ibanjwe ngoLwesibili ePhalamende likaZwelonke.
Kodwa-ke, uSomlomo uNosiviwe Mapisa-Nqakula umemezele ngoMsombuluko kusihlwa ukuthi ihlehlisiwe ukuze amalungu ePhalamende angu-400 abe khona ngokoqobo uma kuqhubeka inkulumo-mpikiswano.
Lokhu kulandela umhlangano okhethekile wekomiti lezinhlelo zePhalamende likaZwelonke ngoMsombuluko ebusuku.
Inkulumo ngodaba lwepulazi i-Phala Phala izothatha isinqumo sokuthi uRamaphosa uzobhekana yini nokushushiswa okuzothi uma kuphumelela aphucwe imihlomulo kaMengameli impilo yakhe yonke okubalwa umholo kanye nezokuphepha.
IKomiti eliPhezulu likaZwelonke le-ANC (NEC) liyalele amalungu eqembu angu-230 ePhalamende ukuthi avotele ukwamukelwa kwalo mbiko. URamaphosa uwuthathile umbiko wawuhambisa ukuze ubuyekezwe ngemuva kokufaka amaphepha eNkantolo yoMthethosisekelo.
IKomiti eliPhezulu likaZwelonke lihlangane ngoMsombuluko e-Nasrec, eGoli ukudingida ngekusasa likaRamaphosa ngesikhathi engekho. Uye wakhishwa emhlanganweni ngoba bekukhulunywa ngaye.
URamaphosa omise umsebenzi wakhe osemthethweni kulandela umbiko omubi wangesonto eledlule, usephinde wabuyela emsebenzini wakhe wokuba nguMengameli.
Ubephethe umhlangano wezeSayensi yoMhlaba eKapa ngoLwesibili mhla ziyisithupha kuZibandlela.
Ithimba lomthetho wesigaba-89 eliholwa iJaji uSandile Ngcobo lithole ukuthi uRamaphosa unecala azoliphendula ekufihleni icala lokweba u-$600,000 epulazini lakhe i-Phala Phala ngoNhlolanja ngo-2020.
Leli thimba liphinde lathola ukuthi u-$850 000 okuthiwa wawufihlwe kusofa awuzange udalulwa eBhange loMbuso lakuleli.
URamaphosa wenza konke okusemandleni akhe ukuze agcine isikhundla sakhe sokuba nguMengameli we-ANC uma leli qembu selibambe ingqungquthela yokukhetha ubuholi yesi-55 kusukela ngomhlaka-16 kuya kumhlaka-20 kuZibandlela e-Nasrec, eGoli.
Ubanga lesi sikhundla nowayenguNgqongqoshe wezeMpilo uZweli Mkhize.
Esithombeni esingenhla: UMengameli uCyril Ramaphosa