Moyahabo Mabeba
Icala likaThemba Dube odabuka e-Zimbabwe osolwa ngokubulala seliphinde lahlehliswa futhi kanti lokho kushiye imindeni yabashonile ithukuthele.
UDube, osolwa ngokubulala abesifazane abayisikhombisa, uvele ngaphambi kweMantshi uTumishang Tladi eNkantolo yeMantshi yase-Seshego ngaphandle kwase-Polokwane e-Limpopo nommeli we-Legal Aid ngoLwesine.
Umshushisi woMbuso u-Anna Thabana uthe sekwengezwe elinye icala lokuhlala kuleli ngokungemthetho emacaleni okuqala okubulala abesifazane abayisikhombisa.
“Kunemininingwane eyengeziwe esalindiwe mayelana naleli cala. Njengamanje uphenyo lusaqhubeka futhi lolu daba lusazohlehliswa ngesikhathi umsolwa esagqunywe esitokisini”.
Ukuhlehla kwecala akufikanga kahle kweminye imindeni yabashonelwe, futhi ithe ifuna leli cala liphothulwe kodwa okubaluleke kakhulu ukuthi kudedelwe izidumbu zabathandiweyo babo.
UTanaka Chihowhi owazalelwa e-Zimbabwe uthe uphoxekile ngohlelo lolibofuzo olubambezele ukukhululwa kwesidumbu sikamzala wakhe uChisimango Gumbo.
UTanaka uthe abaqondi ukuthi kungani le nqubo ithatha isikhathi eside kangaka.
“Siyazi ukuthi isidumbu abasithole esesibolile ngesikaChisimango. Esikucelayo nje kuhulumeni waseNingizimu Afrika ukuthi asikhululele isidumbu futhi asivumele simngcwabe siqhubeke nezimpilo zethu”.
UTanaka uthe izenzo ezimbi ezenziwa nguDube nomkhaya wakhe yizo ezidala ukuthi abase-Zimbabwe bengabe besamukeleka e-Seshego.
Izidumbu zabesifazane ebesezibolile zalahlwa ezindaweni ezahlukene e-Seshego, e-Polokwane, e-Mankweng nase-Westenburg.
UDube waboshwa ngomhlaka-3 ngoLwezi ngemuva kokuthi atholakale nomakhalekhukhwini okusolakala ukuthi ngowesifazane owathunjwa e-Lebowakgomo ngoMfumfu.
UDube uzogqunywa esitokisini kuze kufike usuku lokuvele enkantolo ngomhlaka-28 kuNhlolanja enkantolo efanayo.
UDube usinqabile isicelo sakhe sebheyili.
.
