Celani Sikhakhane
Icala lenkohlakalo lowayenguMengameli wezwe uJacob Zuma lihlehliselwe umhla 1 Agasti eNkantolo eNkulu yaseMgungundlovu.
Kulokhu kungenxa yokubambezeleka kwelinye icala lakhe eNkantolo eNkulu yokuDluliswa kwamaCala (SCA).
Icala lenkohlakalo uZuma abhekene nalo nenkampani yase-France i-Thales bekumele liqhubeke eNkantolo eNkulu yaseMgungundlovu ngoLwesibili.
Icala lihlehlisiwe njengoba kusalindwe umphumela wemizamo kaZuma yokudlulisa isinqumo seNkantolo eNkulu mayelana nesicelo sakhe esikhethekile.
UZuma uye kuMengameli weNkantolo eNkulu yokuDluliswa kwamaCala uMandisa Maya ngenyanga edlule ngethemba lokuthi uzosicubungula kabusha isicelo sakhe semvume yokudlulisa isinqumo sokuchithwa kwesinqumo seNkantolo eNkulu esichithwe ngamajaji amabili okudlulisa amacala.
Umshushisi uBilly Downer utshele inkantolo ukuthi basalinde isinqumo.
“Ngike ngakhuluma nombhalisi we-SCA kabili kanti kuqinisekisiwe ukuthi awukho umphumela we-SCA mayelana nesicelo sikaMnu Zuma. Umlayezo wokugcina engiwuthole kumbhalisi ukuthi umbiko usendleleni eya kuMengameli. Isizathu sokubambezeleka asicacile kimina,” kusho uDowner.
I-Scrolla.Africa sizamile ukuxhumana nokhulumela iNhlangano iJG Zuma Foundation uMzwanele Manyi mayelana nokubambezeleka kwe-SCA kodwa akatholakalanga ukuba aphawule.