Lubhalwe ngu-Anita Dangazele
- Umbiko udalule izigidi zemali yomphakathi ezebiwe ngezivumelwano zenkohlakalo esiShayamthetho saseMpumalanga Kapa.
- I-ANC yathola u-R3.8-million ebingawufanele ngesikhathi imali yokuthuthukisa ezobuchwepheshe inyamalala ezinkontilekeni ezibizayo.
Owangaphakathi udalule ukuthi imali ehloselwe abampofu intshontshwa kanjani esiShayamthetho saseMpumalangaKapa, eBisho.
Impimpi ithumele ubufakazi ezigungwini eziqaphayo obukhombisa ukuthi imali yomphakathi isetshenziswa kanjani ukuze abathile bacebe esikhundleni sokusiza imiphakathi.
Ubufakazi bukhombisa ukuthi ngoMandulo i-ANC yakhokhelwa u-R3.8-million ebingawufanele. Buphinde buveze ukuthi u-R4-million okwakufanele uthuthukise ubuchwepheshe besiShayamthetho ngonyaka ka-2021 awuzange usetshenziswe. Manje izindleko sezifinyelele ku-R16-million kanti izinkampani ezimbili ezikhethiwe zithola u-R85,000 isikhathi ngasinye.
Impimpi iphinde yaveza ukuthi izikhulu zawaqamba kanjani amanga ukuze zithole enye imali yokuvulwa kwesiShayamthetho eNtabankulu zaqasha izinkampani nama-consultants abangenazo iziqu abakhokhisa ngokweqile.
Kwesinye isigameko, baqoka umqeqeshi owabiza u-R348,000 wokuqeqesha abasebenzi nakuba wayekhona omunye umqeqeshi onamaphuzu angcono owazifunela u-R171,000 nje kuphela.
Baze bachitha izigidi ngesikhathi sokuqeqeshwa eNelson Mandela Bay lapho ingxenye yabasebenzi ingafikanga khona bathumela izikhulu zezabasebenzi eSun City ngo-R54,000 umuntu ngamunye.
USotshwebhu weDA uYusuf Cassim uthe lezi zinsolo zikhombisa inkohlakalo ejulile.
“Lezi zinsolo zikhomba isiShayamthetho esibanjwe yinkohlakalo nokusetshenziswa kwemali budlabha, nokuqeda ukuthembeka emphakathini kulesi sikhungo. Kufanele kungenelelwe ngokuphuthuma ukuze kubuyiswe isithunzi nokuvikela izinsiza zomphakathi,” kusho uCassim.
Uzocela uSomlomo uHelen Sauls-August ukuthi aphenye.
“Ukwehluleka ukuthatha izinyathelo kuzovumela labo abathintekayo ukuthi bagange ngobufakazi futhi kucekele phansi noma yiliphi ithuba lobulungiswa,” usho kanje.
“Abantu baseMpumalanga Kapa bafanelwe yiSishayamthetho esibasebenzelayo, hhayi lesi esicebisa labo abaphethe iSikhungo. Lesi yisikhathi sokuthatha izinyathelo ezinqala.”
IsiShayamthetho saseMpumalanga Kapa sitshele iScroll.Africa ukuthi besingazi lutho ngalezi zinsolo futhi bazithole ngabezindaba. Saphinde sathi azikho izinyathelo ezizothathwa ngalolu daba ngoba bezingaziwa lezi zinsolo.
Esithombeni esingenhla: Ingaphakathi emhlanganweni esiShayamthetho sesiFundazwe saseMpumalanga Kapa.
Umthombo Wesithombe : Facebook