Lubhalwe nguSelloane Ntshonyane
Amathuna ase-Hamberg e-Roodepoort avulwa kabusha ngemuva kweminyaka engu-37, anezindawo ezintsha zokungcwaba ezingu-1,500 zezakhamizi zendawo.
Amathuna ase-Westpark e-Randburg azovala ngoNcwaba ka-2025 ngemva kweminyaka engu-83, njengoba idolobha likhuthaza ezinye izindlela zokungcwaba.
Amathuna osekuphele cishe iminyaka engu-37 evaliwe ayavulwa njengoba iGoli lidonsa kanzima ukuthola izindawo zokungcwaba.
I-Johannesburg City Parks and Zoo ivula kabusha amathuna ase-Hamberg e-Roodepoort ngemuva kokuthola okungenani izindawo ezintsha zokungcwaba ezingu-1,500 zabantu abahlala eduze.
Lesi sinyathelo siza ngemuva kokuthi idolobha limemezele ukuthi amathuna ase-Westpark e-Randburg azovala ekupheleni kukaNcwaba ka-2025 ngemuva kweminyaka engu-83 kungcwatshwa abantu.
I-City Parks and Zoo ikuqinisekisile ukuthi amanani okungcwaba emathuneni ase-Hamberg azohlala enjalo njengamadala.
UMnuz David Maluleke, oyi-Chief Operations Officer e-Johannesburg City Parks, uthe ngeke bahlale babukele izakhamuzi zaseGoli zidonsa kanzima ngezindawo zokungcwaba wathembisa ukuthi bazozigcina lezi zindawo.
“Njenge-JCPZ simatasatasa nokugqugquzela ukuthi kungcwatshwe ngenye indlela, njengokungcwatshwa okufana nokuthi uma ngidlulisa emhlabeni unkosikazi wami angangcwatshwa phezu kwami noma kushiswe isidumbu,” kusho uMaluleke.
Uthe ukulandela leyo ndlela yokungcwaba kuzosiza ukonga umhlaba ukuze ukwazi ukubhekana nezinye izidingo ezifana nezindlu.
UMnuz Herman Oelofse, isakhamuzi sase-Hamberg, uthe lokhu kuhle emphakathini njengoba angeke kusadingeka ukuthi bahambe imizuzu engaphezu kuka-20 beya emathuneni ase-Westpark ukuze nje bangcwabe abathandiweyo babo.
I-City Parks and Zoo ithembise izakhamuzi ukuthi kunendawo eyanele yokungcwaba iminyaka engu-30 kuya kwengu-40 ezayo, ngisho nangaphandle kokusebenzisa amathuna angasetshenzisiwe.
Idolobha manje selisele namathuna ase-Olifantsvlei eningizimu ekude yeGoli, amathuna ase-Waterval e-Midrand, amathuna ase-Diepsloot engxenyeni esenyakatho yeGoli, kanye namathuna ase-Hamberg avulwe kabusha e-Roodepoort.
Esithombeni esingenhla: Ukuvulwa kabusha kwamathuna ase-Hamberg.
Umthombo wesithombe: Selloane Ntshonyane