Lungani Zungu
Isinqumo esiphume ecaleni lokushaya elibhekiswe kumholi we-EFF uJulius Malema nelungu leqembu uMbuyiseni Ndlozi sithi abanacala.
Laba basolwa ngokushaya uLieutenant-Colonel Johannes Venter enkonzweni yomngcwabo kaWinnie Madikizela-Mandela e-Fourways ngo-2018 ngemuva kokuthi uVenter ezame ukubavimba ukuthi bengangeni emathuneni.
Enkantolo uVenter uthe imoto uMalema ayehamba ngayo yayingenayo imvume yokungena emathuneni wabe esemisa imoto.
Lokhu kwacasula uMalema noNdlozi. Behla emotweni kwase kuba nokuhilizisana phakathi kwabo noVenter.
Lesi sigameko saqoshwa kwi-CCTV ngasesangweni lamathuna obekuyingxenye yobufakazi enkantolo.
Ngaleso sikhathi uNdlozi wayekhulumela i-EFF.
IMantshi uLeiland Poonsamy uthe kunohide lokungahlangani kwezindaba zofakazi bombuso waphinde waveza ukuthi ubufakazi bukaMalema noNdlozi “bucacile”.
“Abazange baphambuke nganoma iyiphi indlela. Abazange bakhulume into ebheke eceleni,” kusho uPoonsamy.
UMbuso wehlulekile ukuveza ubufakazi bokuthi uMalema noNdlozi bebengeyona ingxenye yomngcwabo, kusho uPoonsamy.
“Inkantolo ithola ukuthi okushiwo abammangalelwa kuyiqiniso. Ngakho-ke ngiyakwamukela ukuthi ukuzivikela kumele kuqiniswe nokuthi abammangalelwa babengahlosile ukushaya ummangali,” kusho uPoonsamy.
“Ngakho-ke, bobabili abasolwa abanacala futhi bayakhululwa ecaleni lokushaya.”
Inkantolo ibe mnyama ngemuva kokucima kukagesi ngesikhathi uPoonsamy ethula isinqumo sakhe. Ngesikhathi umshini wokuphehla ugesi ukhahlela emizuzwini embalwa kamuva uye waqhubeka nokwethula isinqumo sakhe.
UMalema ukhulume nedlanzana labalandeli beqembu abebegqoke ezibomvu ngaphandle kwenkantolo ngemuva kwesinqumo.
Lokhu akusona isiphetho sezinkinga zomthetho zikaMalema.
Kulindeleke ukuthi abuyele enkantolo ngomhlaka-30 kuMasingana ngo-2023 ngesigameko sokudubulana ngesikhathi kugujwa usuku lokuzalwa lwe-EFF ngo-2018 eMdantsane, e-Eastern Cape.
UMalema ubhekene necala lokutholakala nesibhamu esingekho emthethweni, ukutholakala nezinhlamvu ezingekho emthethweni kanye namacala amathathu okwephula umthetho we-Firearms Control Act.
Lokhu kungemuva kokuthi kuputshuke ividiyo ekhombisa uMalema ephethe into engathi iyisibhamu kanti kusolakala ukuthi ubedubula emoyeni ngesikhathi iqembu linomcimbi e-Eastern Cape.
Ubekwe icala kanye nonogada wakhe u-Adriaan Snyman.
Umthombo wesithombe: @EFFSouthAfrica