Lubhalwe nguZukile Majova
Umhleli wezepolitiki
Sekuphinde kwathelwa othulini ngenhlamvu elinye ikhansela eKZN.
UNtombenhle Mchunu (75) obeyikhansela leNFP kuMasipala waKwaNongoma udutshulwe wabulawa ngabantu abangenele kwakhe. Kanti umfana oneminyaka emine abenaye ulwela impilo yakhe esibhedlela ngemuva kokuthola amachaphazelo.
UMchunu nomzukulu wakhe bebelele emzini wakhe KwaNongoma ngesikhathi kugasela amadoda abehlomile ngezithuba zabo-01:00 ngeSonto ekuseni afike avulela ngenhlamvu.
Kuthiwa ushonele endaweni yesigameko ngesikhathi umzukulu wakhe ephuthunyiswa esibhedlela naye enamanxeba okudutshulwa.
Okhulumela amaphoyisa uBrigadier Athlenda Mathe uthe: “Ithimba le-SAPS Political Killings Task Team selihlanganise izinsiza ukuze kuboshwe labo ababulale ikhansela le-NFP KwaNongoma”.
“Kuphenywa icala lokubulala nelokuzama ukubulala. Umzukulu wekhansela oneminyaka emine usesimweni esibucayi kulandela ukudutshulwa.”
Lesi isigameko sakamuva ochungechungeni lwezigameko esezidlule nenqwaba yemiphefumulo yamakhansela eKZN kusukela ngokhetho lohulumeni basekhaya ngo-2021.
Kulezi zinsuku njengoba omasipala abaningi enyakatho ne-KZN bebuswa ngohulumeni bobambiswano, ukubulawa kwekhansela lewadi kungenza izinguquko kumasipala wonke.
I-NFP kaMchunu isanda kuhlangana ne-ANC ne-EFF yathatha izintambo zokuphatha umasipala waKwaNongoma ku-IFP.
Umasipala waKwaNongoma nowasoLundi awukaze uphathwe ngelinye iqembu ngaphandle kwe-IFP.
Ukubulawa kukaMchunu kuza ngemuva kokuputshuka kwezi eliqoshiwe ebelithi uNongoma ungowe-IFP.
I-ANC isinxuse uNgqongqoshe wamaPhoyisa, uMnuz Bheki Cele ukuba aphenye ngezigameko zokubulawa kosopolitiki esifundazweni okuhlanganisa nesigameko sakamuva sokubulawa kwekhansela le-ANC, uMnuz Dumaza Mtshali kuMasipala waseBaqulusini.
I-Scrolla.Africa isanda kubika ukuthi umsebenzi wokuba yikhansela usuyingozi kakhulu e-KZN(https://izindaba.scrolla.africa/umsebenzi-wobukhansela-isuphenduke-ithuna/ ). CHOFA LAPHA
USihlalo we-SA Local Government Association uThami Ntuli usenxuse ukuthi kuvikelwe kangcono amakhansela uma uphiko lwezobunhloli lwamaphoyisa lukhombisa ukuthi impilo yawo isengcupheni.
Esithombeni esingenhla: Ikhansela leNFP uNtombenhle Mchunu odutshulwe wabulawa esemzini wakhe KwaNongoma, KwaZulu-Natal
Isithombe: Sithunyelwe