Osomabhizinisi baseKapa banqume ngazwi linye ukuthi bamise ukusebenza, kulandela izincwadi ezisabisayo ezifuna imali yokubavikela.
Okhulumela umphakathi e-Mitchell’s Plain uthe, “Amabhizinisi ethu awenzi kahle sidonsa kanzima ukuze senze inzuzo njengamanje siphoqeleka ukuthi sikhokhe u-R1 500, sizoyithathaphi imali engaka?”
Izincwadi zisabisa ngemiphumela emibi kulabo abahluleka ukukhokha.
Umnikazi wesitolo ongaziwa uthe, “Angazi ukuthi sizokubeka kanjani ukudla etafuleni emndenini yethu, sishaqekile sibona ukuthi omunye ohlangene nalokhu uzibiza ngoVladimir Putin kungani benza lokhu kithi sibe sizama ukunakekela imindeni yethu?”
Kwenye indawo ethintekile, e-Mandalay abanikazi bamabhizinisi banikezwe isicelo sokuthi bakhokhe u-R300 kusukela ngomhlaka-25 kuLwezi.
Omunye umnikazi webhizinisi uzwakalise iqiniso elibuhlungu, ethi, “Ayikho into ebuhlungu njengokuqala ibhizinisi lisuka phansi ungenalutho, kodwa uma seliqala ukwenza kahle kufike othile ezofuna imali sifike kanjani kulokhu? ”
Le nkinga isize yaphoqa ezinye izakhamuzi ukuthi zithathe izinqumo ezinzima njengoba uLuyolo Sikoti edalule ukuthi abangani sebethuthele e-Eastern Cape ngemuva kokuphoqwa ukudayisa utshwala.
Udalule ngobunzima umnganakhe abhekane nakho ngesikhathi ethi, “Bamvakashele esitolo befuna abakhokhele u-R1 000 walivala ibhizinisi lakhe kwathi uma bezolanda imali abatholanga muntu othengayo noma ophuzayo endlini yakhe yilapho abamuphoqe khona ukuthi abadayisele, kubi kakhulu lokhu abakwenzayo ngiyethemba ngelinye ilanga bazoyeka.”
Ilungu leKomidi leMeya lezokuPhepha nokuVikela, u-Alderman JP Smith, uthe bayalwazi lolu daba futhi seludluliselwe ezikhungweni zikamasipala wedolobha kanye nasemaphoyiseni.
“Mhla zizinye kuMasingane kuya kumhlaka-10 kuLwezi ngo-2023 kubhaliswe amacala angu-77 ahlobene nokuqola emaphoyiseni,” kusho uSmith.
Lubhalwe intatheli yeScrolla
Esithombeni esingenhla: Osomabhizinisi baseKapa bazovala maduze izitolo zabo kulandela izincwadi abazitholile ezivela kubakhwabanisi befuna imali yokubavikela.
Umthombo wesithombe: Sithunyelwe
.
