Lubhalwe nguRazeen Gutta
Njengoba iNdebe Yomhlaba Yabesifazane iqala ukugqama, iqembu lesizwe lase-Afghanistan lizithola likude nokunakwa izwe lalo kanye ne-Fifa.
Iqembu lisanda kudlala umdlalo walo wokuqala wobungani eminyakeni emibili; nakhona basizwe ukuthi babaleke ezweni lakubo.
Ngemuva kokuthi i-Taliban ithathe izintambo e-Kabul, abesifazane baphuthunyiswe e-Australia futhi manje bazithola sebemele izwe elivimbele zonke izinhlobo zemidlalo yabesifazane.
KuMursal Sadat, ongomunye wamalungu esikwati uthi badlalela labo abangabanga nenhlanhla yokushiya izwe labo.
“Kufanele ngibe yizwi labesifazane e-Afghanistan. Nginesibopho sokumela labo besifazane ezweni lakithi – labo abangakwazi ukufunda, abangakwazi ukusebenza noma ukudlala ibhola noma ukwenza noma yini. Njengamanje ngidlalela bona,” etshela i-BBC Sport.
“Ngikwazile ukungena esikhumulweni sezindiza kodwa umndeni wami wehluleka. Ngashayela ubaba ucingo ngimtshela ukuthi ngiphephile wavele wakhala. Kwakungesinye sezikhathi ezimbi kakhulu empilweni yami.
“Ngashiya konke ngemuva nazo zonke inkumbulo. Kwadingeka ngikhohlwe yikho konke lokho ukuze ngihambe futhi ngiphile.”
I-Fifa ithi isiqaphile isimo njengoba le nhlangano yebhola ihluleka ukuqhakambisa iqembu kuze kube izwe likwenza lokho kuqala.
“Ukuqokwa kwabadlali namaqembu amele inhlangano engamalungu kuwudaba lwangaphakathi. I-Fifa ayinalo ilungelo lokuhlonipha noma yiliphi iqembu ngokusemthethweni ngaphandle kokuthi liqale lihlonishwe yinhlangano yamalungu athintekayo,” kusho okhulumela i-Fifa, ngokusho kwe-The Guardian.
Isithombe esingenhla: Iqembu labesifazane lase-Afghanistan
Umthombo wesithombe: @khalidamiri01