Lubhalwe ngu-Everson Luhanga
Abafundi ababili basenyuvesi bayizisulu zakamuva zodlame oluqhubekayo phakathi kwezinhlangano zamatekisi eGoli
Inyuvesi yaseGoli ikuqinisekisile ukuthi omunye wabafundi bayo ubulawe esigamekweni sokudubula sangoLwesine ntambama e-Braamfontein, eGoli.
Inyuvesi ikhiphe isitatimende esithi ‘I-UJ ibihlungu ngokushona komfundi wayo esigamekweni sokudubula’.
“Kuyadabukisa kakhulu ukuthi iNyuvesi yaseGoli (UJ) ithole ngokushona komfundi wayo esigamekweni sokudubula e-Braamfontein ntambama mhlaka-29 kuNhlolanja 2024. Omunye umfundi uyelulama esibhedlela.”
Isitatimende siphinde sathi laba ababili baphakathi kwabafundi abebehamba ngebhasi besuka enyuvesi beya ezindaweni abahlala kuzo enkabeni yedolobha laseGoli.
“Umufi, oneminyaka engu-18, ubengumfundi owenza unyaka wesibili.
“I-UJ ixhumana nezinhlaka zomthetho eziphenya ngalesi sigameko. Imicabango yethu inemindenini yabafundi abathintekile.”
Isitatimende siphinde sathi inyuvesi ibihlinzeka ngokwelulekwa ngokwengqondo kubafundi abebesebhasini ngesikhathi kwenzeka lesi sigameko.
“Sinxusa bonke abafundi abathintekile ukuthi babike ohlakeni lweNyuvesi kwi-Centre for Psychological Services ngokushesha [email protected].”
Kusolwa ukuthi lesi sigameko sokudubula sihlobene nodlame lwamatekisi lapho bekuhloswe khona amadoda amabili ngemuva komhlangano wabo e-Newtown. Kushone abantu abathathu okuhlanganisa nomfundi ngesikhathi kudutshulwana e-Braamfontein
Esithombeni esingenhla: Ibhasi labafundi base-UJ abaphenduke izisulu zodlame
Umthombo: Everson Luhanga