Lubhalwe nguSelloane Ntshonyane
- Owesilisa(34), waseSoweto, udutshulwe wabulawa elinde emotweni yakhe ngesikhathi kuqhuma i-ATM egalaji lendawo.
- Igalaji linomlando wokuqhunyiswa kwama-ATM okuthathe iminyaka engaphezu kweyishumi.
Uhambo olusheshayo lwendoda yaseSoweto lokuyothenga ukudla luphele kabi ngesikhathi izigebengu zimdubula kade kuqhunyiswa i-ATM.
USizwe Mbuyisa(34), ushone ngesikhathi izigebengu zigasela egalaji lakwa-Total ePimville lapho yena nabangani bakhe bebemise khona imoto beyothenga ukudla neziphuzo.
Umfowabo uNhlakanipho Mbuyisa utshele iScroll.Africa ukuthi uSizwe wayenabangani bakhe ekhaya ngesikhathi benquma ukuyofuna ukudla.
Umndeni ubuke amakhamera onogada akhombisa umngani oyedwa engena esitolo uSizwe nabanye belindile emotweni.
“Izigebengu bezipake ngaphandle kwegalaji. Ngemuva kokuthi umngani engene emotweni, kulapho-ke beqhamuka khona ekhoneni bephethe izibhamu. Umfowethu wethuka wazama ukuhlehlisa imoto. Yilapho-ke lo mfana amdubule khona ekhanda,” kusho uNhlakanipho.
Oshayasibhamu baphoqe wonke umuntu ukuthi alale phansi ngesikhathi ozakwabo beqhumisa i-ATM.
Izithombe zesigameko sangoLwesithathu olwedlule ziveze ukuthi lezi zigebengu bezifuna imali ye-ATM futhi azizange zigebenge muntu.
Babaleke nesamba semali esingaziwa.
Unogada wesigcawu samaphoyisa uthe izigebengu zeqe ngetekisi ekuseni ngomhlaka-5 kuNhlolanja.
Abahlali base-Pimville bangene ezinkundleni zokuxhumana bethi akusona isigameko sokuqala sokuqhunyiswa kwe-ATM kuleli galaji.
“Leli galaji kufanele lingabe lisaba nayo i-ATM; sekuyiminyaka engaphezu kweyishumi kwenzeka into efanayo ngokuphindelela. Babeka abasebenzi babo nomphakathi engozini,” kusho esinye isakhamuzi ku-Facebook.
Esithombeni esingenhla: Indawo yesigameko.
Umthombo: Sithunyelwe