Kushone izingane nabesifazane ngesikhathi kuqhuma ibhomi eMelika

Arthur Greene

Izingane ezine ngabanye babantu abashonile ngemuva kokuthi amasosha aseMelika ehlasele abulala umholi we-ISIS e-Syria ngoLwesithathu ebusuku.

Amasosha akhethekile aseMelika abulale umholi we-Islamic State u-Abu Ibrahim al-Hashimi al-Qurayshi, kodwa kwashona nabantu abangu-13.

Abesifazane abayisithupha nezingane ezine abanye babantu abashonile, ngokusho kweqembu lamavukelambuso  lase-Syria, i-The White Helmet.

Ngesikhathi kuqhubeka lo mkhankaso, kubikwa ukuthi idelakufa liziqhumise ngebhomu, kwashona abantu abaningi.

“Ekuqaleni komkhankaso, obethunyiwe uqhumise ibhomu elibulale yena kanye namalungu omndeni wakhe, okuhlanganisa nabesifazane nezingane,” isikhulu se-Pentagon sitshele i-CNN.

Abazibonele ngamehlo bathi kuzwakale ukuqhuma kwesibhamu esiphuma ezindizeni ezinophephela emhlane ngaphambi kokuqhuma kwebhomu.

“Izolo ebusuku, amasosha aseMelika enyakatho nentshonalanga yase-Syria aphume umkhankaso wokulwa nobethunyiwe ukuvikela abantu baseMelika kanye namadlelandawonye ethu, nokwenza umhlaba ube indawo ephephile,” kusho uMengameli waseMelika uJoe Biden ngoLwesine ekuseni.

UQurayshi waqokwa njengomholi we-ISIS ngoMfumfu 2019. 

Izihloko zakamuva