Dylan Bettencourt
I-Durban University of Technology (DUT) iveze ukuthi zingu-12 izimoto eziqhunyiswe ngamabhomu esikhungweni sayo esontweni eledlule.
Kukholakala ukuthi izimoto nendlu yonogada zishiswe ngabafundi abebebhikisha.
NgoMsombuluko ekuseni kushiswe izimoto eziyisishiyagalombili esikhungweni iNdumiso eMgungundlovu. Imibiko iveza ukuthi abafundi abafuna izikhala zokufunda kulesi sikhungo, yibona abagile lemikhuba.
“Abasolwa abalinganiselwa kwabayisishiyagalombili kuya kwabayishumi baqale ukujikijela amabhomu kaphethiloli endlini yonogada, eseduze kwesango labantu abahamba ngezinyawo ngaku-Edendale Road,” kubika okhulumela i-DUT uSmagele Zuma. “Ngesikhathi sokuhlasela, unogada wesikhungo ubengaphakathi endlini.”
“Ngenhlanhla, ukwazile ukuphunyukundlela wagijima ebheke emahhovisi e-DUT Protection Services eyobikela ithimba lezokuphepha,” kwengeza uZuma.
Kusolakala ukuthi leli qulu ligcwale sonke isikhungo, lashisa izimoto ezahlukene ngaphambi kokuba libaleke endaweni ngemoto.
Isigameko sokuqhunyiswa kweNdumido ngebhomu likaphethiloli siza ngemuva kwezinsuku kushiswe izimoto ezine ophikweni lwenyuvesi iSteve Biko, zonke bekungezabasebenzi basenyuvesi.
Inyuvesi iphoqeleke ukuthi ivale izikhungo zayo ezintathu ngomhlaka-15 kuNhlolanja ngenxa yezigameko zokushiswa kwezindlu futhi zisazohlala zivaliwe kuze kube umonakalo uyalungiswa.
Okhulumela amaphoyisa KwaZulu-Natali, uColonel Themba Mbele, ukuqinisekisile ukuthi kuvulwe icala lokucekela phansi impahla ngamabomu.
“Kusolakala ukuthi ngezithuba zabo-01:15 ekuseni iqulu labantu abangaziwa lishise izimoto eziyisishiyagalombili kanye nendlu yonogada. Kuvulwe amacala okucekela phansi impahla esiteshini samaphoyisa i-Plessislaer ukuze kuphenywe. Amaphoyisa asiqaphile isimo,” kusho uMbele.
Umthombo wesithombe: @IOL
.
