Lubhalwe ngu-Everson Luhanga
Amaqembu amabili ayizimbangi zabavukuzi abangekho emthethweni abedubulana ePrimrose adubule abhekisa ngasemaphoyiseni ngoLwesibili.
Lama qembu ayeke ukudubulana ahlangana ndawonye ukuze ahlasele isitha sawo okungamaphoyisa.
Abavukuzi bahlangane ndawonye baqala ukudubula bebhekise emaphoyiseni.
Amaphoyisa aphindisele ngezinhlamvu kwalimala oyedwa.
Kuboshwe amazama zama angu-8 kulandela ukudubulana ne-JMPD, iSAPS, nezinye izinhlaka zomthetho.
Omunye wabasolwa uphuthunyiswe esibhedlela ngemuva kokulimala. Lo mkhankaso ulandele isigameko sokugetshengwa kwabashayeli ekuseni emgwaqeni onguthelawayeka uM1 ngoLwesibili.
Okhulumela uMnyango wamaPhoyisa kaMasipala waseGoli uXolani Fihla ukuqinisekisile ukuthi abasolwa besilisa abayisishiyagalombili baboshiwe kwathi oyedwa wabo walimala kanzima kulandela ukudubulana namaphoyisa e-JMPD ophiko lweTactical Response Unit emgwaqeni uMain Reef naku-Shamrock Street, ePrimrose, eGermiston.
UFihla uthe izikhulu ziqale umkhankaso ngenxa yezinsolo zokugetshengwa kwabashayeli emgwaqeni uCrown ku-M1 eGoli ngoLwesibili ekuseni.
“Amaphoyisa alandele isikhalazo ngabavukuzi abebehlomile ezimpambanweni zomgwaqo uMain Reef noShamrock Street. Ngesikhathi amaphoyisa efika kule ndawo abone amaqembu amabili amadoda edubulana,” kusho uFihla.
“Ngesikhathi abasolwa bebona amaphoyisa bavele badubula bebhekise emaphoyiseni nawo amaphoyisa aphindisela ngezinhlamvu. Ngesikhathi sokudubulana amaphoyisa abone umsolwa ewela phansi, kwabe sekubizwa amanye amaphoyisa.”
Uthe ngesikhathi kufika amaphoyisa aphuma kwaSAPS Primrose, iFlying Squad, kanye nawe-Airwing, la maphoyisa angene esigangeni lapho efice khona owesilisa oyedwa elele phansi enenxeba nesibhamu eduze kwakhe. Abanye abasolwa abayisikhombisa baboshwe ngamaphoyisa.
Uthe abe-Gauteng Emergency Management Services basize umsolwa olimele waphuthunyiswa esibhedlela iGermiston ukuze aqhubeke nokwelashwa egadwe ngamaphoyisa.
“Bonke abasolwa ababoshiwe, okuhlanganisa nabaseNingizimu Afrika naseLesotho, bagcinwe ePrimrose SAPS futhi babhekene namacala okuzama ukubulala, ukutholakala nezibhamu ezingekho emthethweni kanye nokumba izimayini ngokungekho emthethweni,” kwengeza uFihla.
NgoLwesithathu ekuseni, kube nokubonakala okukhulu kwezinhlaka zamaphoyisa ezihlukene kuthelawayeka uM1.
Isithombe esingenhla: Kuboshwe amazama zama
Umthombo wesithombe: Sithunyelwe