Lubhalwe nguCelani Sikhakhane
Kuphele amahlathi okucasha emafemini akwa-Sithebe e-Mandeni asolwa ngokuqasha abantu base-Lesotho abakuleli ngokungemthetho.
Lokhu kulandela ukuthi ngoLwesihlanu amaphoyisa abophe omunye wabaqashi nabanye abasebenzi abakuleli ngokungemthetho abadabuka e-Lesotho.
Laba baboshwe ngemuva kokutheleka kukaNdunankulu waKwaZulu-Natal uThami Ntuli kanye namaphoyisa kungazelele muntu.
UNtuli uthe abanye abaqashi bavale amafemu babaleka ngesikhathi kufika amaphoyisa.
Omunye wabasebenzi uNksz Lihle Nxumalo udalule ukuthi amafemu akwa-Sithebe aqasha abantu bokufika kuleli abasuka e-Lesotho ukuze abaxhaphaze.
“Okwenzekayo ukuthi thina uma sifika emsebenzini sekudlule isikhathi sibuyiselwa emumva kodwa uma kuyilaba base-Lesotho abenziwa lutho.
“Okunye laba base-Lesotho bafukuziswa ubusuku nemini ngoba kuyaziwa ukuthi amalungelo abo awavikelekile,” kusho uNksz Nxumalo.
La mafemu akwa-Sithebe ahlale esolwa ngokungabaqashi abantu bendawo.
Ngakolunye uhlangothi uHulumeni waKwaZulu-Natal ufuna ukuwavuselela ukuze adale amathuba emisebenzi kubantu ababalelwa ku-50 000 esifundazweni.
Nasemafemini ase-Newcastle kuyakhalwa ngokuthi aqasha abantu base-Lesotho abakuleli ngokungemthetho.