Menzi Magubane
Isizini isanda kuqala, kodwa sekunamaqembu amathathu ahlukene nabaqeqeshi bawo kanti abanye basulile ezikhundleni zabo.
I-Marumo Gallants ikuqinisekisile ukubuya kukaDan Malesela njengomqeqeshi wabo ngemuva kokuhlukana naye ngoNhlangulana.
Khonamanjalo i-Moroka Swallows ikuqinisekisile ukuxosha uDylan Kerr ngemuva kokuthelwa ngehlazo ngamagoli amane eqandeni bebhekene ne-Golden Arrows ngoMgqibelo.
I-Gallants yase-Limpopo ibingenaye umqeqeshi ngemuva kokuthi umqeqeshi wase-France uRomain Folz esule ekuqaleni kwenyanga.
Ngemuva kokuthi lo mqeqeshi ezame ukushiya isikhundla sakhe, uSihlalo we-Gallants uDitonkana Sello uthe bayayinqaba incwadi kaFolz yokwesula.
NgoLwesibili nokho uSello ukhiphe isitatimende eqinisekisa ukubuya kukaMalesela nokushiya kukaFolz.
“Indima ijwayelekile kuMalesela. Uhole i-Gallants njengomqeqeshi ngaphambi kokuphela kwenkontileka yakhe ekuqaleni konyaka,” kusho uSello esitatimendeni.
USello uthe uMalesela uzoqala ukusebenza ngoLwesibili.
“Ngemuva kokuxoxisana kuthathwe isinqumo sokumamukela emndenini we-Marumo Gallants. Imidlalo ezayo siyibheke ngabomvu futhi sinombono omuhle,” kusho uSello.
UMalesela ubuyele ku-Gallants ngemuva kwesonto esule kwi-Royal AM. Ukubuya kwakhe kuthuse abaningi ngemuva kokuthi eshiye iqembu lingenzi kahle ekupheleni kwesizini edlule.
Ushiye i-Gallants ekhononda ngokugxambukela kwabaphathi ngesikhathi eqala ishumi nanye, okuyisizathu esifanayo esenza ukuthi uFolz asule.
Khonamanjalo, i-Swallows ishaywe ngamagoli amane eqandeni okuyishiya endaweni ka-14 ngamaphuzu amane ngemuva kwemidlalo eyisishiyagalombili okuholele ekuxoshweni kukaKerr.
UKerr osize i-Swallows yagwema ukuba sezansi kwetafula ngesizini edlule uqale umkhankaso omusha edonsa isigwebo semidlalo emibili.
UMusa Nyatama nguyena osebhentshini njengomdlali noma njengomqeqeshi.
UNyatama kungenzeka aqhubeke nokuba ngumqeqeshi obambile ngesikhathi i-Swallows ifuna azovala isikhala sakhe.
Isizini isaqala kanti vele amaqembu amathathu asexoshe abaqeqeshi kwathi abanye abaqeqeshi basula ezikhundleni zabo.
Umthombo wesithombe: @Goal